February 17, 2016
Reo Kooti
Reo Kooti
Kia kaha ake te whakamahinga o te reo Maori ki nga kooti o te ture.
Kua whakaakohia nga kaimahi ki etahi momo mihi kei a ratou hoki etahi rauemi aawhina.
Aapiti atu kei tena kooti, kei tena kooti he kaiwhakahaere o te reo.
Kaati kua tae kee nga whakapaahotanga o te reo ki etahi kooti pera i te Kooti Rangatahi me te Kooti Whaanau.
Tuupeka momore
E harikoa ana nga roopu auahi kore ki te karanga a te Piriimia ka aata titiro te kaawana ki nga pouaka momore mo nga paipa me te tuupeka.
Hai taa John Key na te hinganga o te wero o kamupene Philip Morris ki te kaawana o Ahitereiria kaore e roa ka korero ano te Paaremata o Aotearoa mo tera kaupapa.
E kii ana nga kairangahau he mea mauritau nga pouaka momore ki te whakatahuri i te aro o te hunga kaipaipa ki waahi kee.
Kaiako pai
Kaare he take o nga kura hourua i Aotearoa.
Koia te tirohanga a te Peretini o te Kaahui o nga Tumuaki a Iain Taylor i runga i te putanga o te rangahau e kii ana kei runga noa atu nga kaiako o tenei whenua he orite ki nga tino kaiako o te ao.
Hai taana ae kua tuukinotia nga aakonga Maori e te puunaha auraki i roto i nga tau, engari he rerekee nga tikanga whakaako i enei raa.
Pomare whakamaharatanga.
E hui ana te hapuu o Ngati Manu i te raa nei ki te maumahara i to ratou tupuna i a Pomare te tuarua.
Ko tenei te huritau o te waa na Pomare te Tiriti o Waitangi i haina ki Opua.
Hai taa kaiwhakahaere a Arapeta Hamilton ka aro hoki a Ngati Manu ki o ratou hononga tata ki a Te Tirarau o Te Parawhau, ki a Kawiti o Ngati Hine.
Whakapuaretia nga kanohi.
Me mutu te tari whakatika tangata ki te huna i tana maatenga ki te kirikiri.
Koia te whakahau a Kim Workman kaikorero mo nga take o te ture.
Ki a ia kaahore te tari e aronui ana ki nga tatauranga mo nga mauhere Maori me to ratou manawapaa ki te korero mo aua tatauranga i runga i te tika me te pono.
Hai taana ano kua tae ki te waa kia aata titiro te tari whakatika ki nga kaute e paa ana ki te Maori kaua ranei e tito i nga kaute.
Oranga a motu.
Kua tukua mai e te Salvation Army taa ratou puurongo mo te ahua o te motu i tenei ata.
E mea ana ratou he nui nga tatauranga e tika ana kia whakapai ake pera i te maha o nga Maori kei roto i nga whare herehere, kei te noho kaainga kore, kei te huhi i te rawakoretanga.
Hai taa ratou ano me rapu huarahi te kaawana kia kuhu atu ki roto i nga haapori, ki te mahi ngaatahi ki nga roopu Maori, ki nga whaanau Maori hai a mua i te takanga o etahi ki te hee.
Copyright © 2016, UMA Broadcasting Ltd: www.waateanews.com