February 16, 2016
Kei hea nga ahuatanga Maori?
Kei hea nga ahuatanga Maori?
He ngoikore te piripono a Irirangi Aotearoa ki te reo Maori.
Koia te whakapae a Willie Jackson tiamana o Te Whakaruruhau o nga Reo Irirangi Maori whai muri te kitenga kore ira tahi paiheeneti te roanga o nga kaupapa Maori kua whakapaahotia nei e Irirangi Aotearoa mai te marama o Noema i tera tau ki Hanuere i tenei tau.
Hai taa Jackson ano kua tae ki te waa kia korero a Irirangi Aotearoa mo te rerenga ki hea o a ratou puutea.
Waitangi he kaupapa toorangapuu.
He tohu te rerenga o te puehu i Waitangi kei te kuhu atu nga take hononga a iwi ki nga hooro o Paaremata.
Hai taa kairangahau Bryce Edwards o te Whare Waananga o Otaakou kaua e titiro atu ki te raa o Waitangi hai rangi a motu engari tirohia hai waa motuhake i hainatia ai te Tiriti.
Hai taana ano kei te kite i te hoohaa o te Maori ki nga tikanga arokore a te kaawana ki nga kaupapa Maori.
Kiriata hou.
Kua tae kee te pukapuka a Witi Ihimaera e kiia nei ko Bullibasha ki te mata kiriata.
Ko Mahana te iingoa o te kiriata nei kua whakaaturia i te ahurei kiriata o Berlin i nga raa whakataa.
Ko Temuera Morrison raaua ko Akuhata O'Keefe nga whetuu aa ko Lee Tamahori te kaiwhakarite o Mahana.
Ka whakatuuwhera i te kiriata nei ki nga whare pikitia o Aotearoa hai te tuatoru o Poutuuterangi.
He Ruu Ano.
Kua ruu ano te whenua i te tonga o Rakiura i tenei ata aa i rongohia i Otepoti.
Ko te puutaketanga o te ruu kotahi rau whitu tekau kiromita ki te tonga maa uru o Rakiura e ono tona kaha tekau kiromita te hohonutanga.
E ai ki te tari puutaiao o Geonet he ruu tino kaha tera he mea kino ake i te wiriwiri ki Otautahi i nga raa whakataa.
Awaroa, whakahokihia!
Whakahokia te one moana o Awaroa ki te Maori te karanga a nga rangatira a iwi o te rohe whaanui o Whakatuu i te Waipounamu.
Hai taa Paul Morgan tiamana o te roopu o Wakatuu me etahi atu rangatira i riro atu taua whenua i te kaawana kia whakaritea hai waahanga o te Abel Tasman National Park.
Hai taa Taku Paarae tiamana o Ngati Toa kaare e tika ana kia whakawhiti i taua whenua ki nga ringaringa o te motu.
Kaati e rua miriona taara kua kohia huri noa Aotearoa ki te hoko i te whenua ataahua o Awaroa.
Pire rongoaa
Kei te piki haere te maha o nga tuuroro mate pukepuke
e huri nei ki te rapu puutea kia hoko i nga pire rongoaa hou.
E tatari ana ratou kia whakaae a Pharmac me kore te motu e utu i aua rongoaa.
Kaahore e whakakapia ana te utu nui o nga pire hou no konaa e whakamomori ana nga tuuroro ki te whakapaa atu ki aua pire.
Copyright © 2016, UMA Broadcasting Ltd: www.waateanews.com