Tauira korero.
Ma te tautoko o te whaanau ka puta te ihu o nga tauira i te ao maatauranga.
Koia te korero a nga aakonga Maori Pasifika ratou ko nga tauira o Aahia engari ki taa te Paakeha titiro ma ratou ano ratou e whakaputa horekau he korero whakamihi ki te whaanau.
E kii ana nga kairangahau o te Whare Waananga o Taamaki na runga i nga kitenga nei me whakahaangai nga kura maahita i a ratou tikanga whakaako ki te whakakipakipa i tena iwi, i tena ahurea.
Toremi rangahaua.
Tokomaha nga Maori ka toremi ia tau ia tau no reira kei te whakarite rangahau ki te whakatewhatewha i taua tatauranga kino.
Kaahore i aata rangahaua te kaupapa nei ahakoa nga matenga o te waa.
Te hanga nei he tata to tatou hononga ki te moana engari ka tini te maha o nga toremitanga.
He kaupapa motuhake.
He mea nui te tirohanga atu ki nga roopu Maori noho taone me to ratou mana motuhake.
Koia te korero a Peeni Henare o te roopu Reipa ko ia kei te piikau i te here ki te aawhina i era roopu.
No kona hai taa Henare he korero ano mo nga roopu noho taone haaunga ano nga iwi me nga whakataunga Tiriti o Waitangi.
Hai taana ano kua warea tana tari e te hunga e oke ana, horekau he puutea, horekau he aha i tenei waahanga o te tau.
Otautahi waahi taakaro.
He taonga te tamariki.
I runga i taua whakaaro kua tuuwheratia he waahi taakaro hou i Otautahi rua tekau miriona taara te utu.
Hai taa Minita Ruu Whenua a Gerry Brownlee ma te waahi taakaro raa ka whakarato i tetahi papawhenua pai mo nga whaanau i nga marama o te raumati.
Kei reira ka kite i te whakaaturanga o etahi puuraakau a Ngai Tahu me te ahua o te Maori.
Paati Maori Tuupeka
E harikoa ana te Paati Maori ki te hinganga o kamupene tuupeka a Philip Morris i taa ratou tono ki te huripoki i te ture i Ahitereiria mo nga pouaka momore ki nga paipa.
Ko Ahitereiria te whenua tuatahi o te ao ki te whakamahi i nga pouaka momore.
Hai taa Maarama Fox rangatira takirua o te Paati Maori ko tana tumanako kia whakatatuu tetahi pire mo nga pouaka momore ki Aotearoa a tera tau.
Reipa Iraq
Ma te pai anake e tika ana kia uru o tatou hoia o nga roopu motuhake ki te pakanga i te whenua o Iraq.
Koia te korero a te roopu Reipa i te ata o te Kirihimete.
E whakapono ana a Reipa he kaupapa whakahirahira ki te whawhai atu ki a ISIS ki roto o Iraq, kaua e kuhu atu ki Syria. Hai taa Reipa ano ahatia nga korero me aata haere.
Copyright © 2015, UMA Broadcasting Ltd: www.waateanews.com
