December 07, 2015
Apanui kua heke.
Apanui kua heke.
Kua heke a Darrin Apanui i tana tuuranga hai tumu whakarae o Te Matatini Kapa Haka Aotearoa.
Hai taa Selwyn Parata tiamana o Te Matatini i tana ono tau e araahi ana i te roopu raa kua whakakaha i te tuu oohanga o Te Matatini kua whakapakari hoki i nga hononga ki nga roopu toha puutea me nga tari kaawana.
Kua haere a Apanui ki taawaahi ki reira, rapu tuuranga mahi ai.
'He taniwha' te poari.
Whakakorengia te Poari Tohutohu Maori a te Kaunihera o Taamaki.
Koia te karanga a Judith Collins o te kaawanatanga i tetahi hui a te roopu ACT i nga raa whakataa.
Hai taana he taniwha taua poari, he nui rawa atu, ka haere i tana haere me te kore o nga kupu whakaatu mo te aahua o a ratou mahi.
Hai taana ano kei waho o te ture te poari Maori raa e tuu ana.
Tuwharetoa Kooti Rangatahi
Kua whakarite i tetahi Kooti Rangatahi ki Taupo.
I whakarewaina te Kooti Rangatahi ki Tuuwharetoa ki te marae o Rauhoto i te Raahoroi.
I reira ko etahi kaiwhakawaa me te Ariki o Tuuwharetoa a Taa Tumu Te Heuheu e tautoko ana i te kaupapa.
Koia te 14 o nga kooti rangatahi i Aotearoa hai taa Minita Take Kooti a Amy Adams ko te tikanga kia whai waahi nga haapori Maori ki nga whakaritenga whakatika rangatahi kia akiaki
hoki nga hononga ahurea.
Whakahee i a Naahinara.
Ko te pire hai tautoko i nga tamariki o nga kainga poohara i whakaara ake i tera wiki he kaupapa ka whakakino i te noho a te hunga penihana.
Koia taa Sue Bradford mema paaremata o mua o nga Kaakaariki me tana kii koia te take i aarahi ia i te poroteehi ki waho o te haakari Kirihimete o te roopu Naahinara i nga raa whakataa.
Hai taa Bradford me pehea nga rangatira o Naahinara e inu waina ana me nga kai reka rawa i te waa e piki haere ana te rahi o te hunga kaingakore me te oke o nga whaanau i te Kirihimete.
Kei te oke tonu te Maori
Kaua e whakapono ki nga korero a etahi e pai ana te noho a te Maori i raro i a Naahinara.
Koia te korero a Kelvin Davis Mangai Whanake Maori o te roopu Reipa me tana kii haaunga ano nga whakataunga tiriti o waitangi me te tupu o te oohanga Maori ko te koremahi, ko te hauora, ko nga kaupapa whare koia kee etahi ahuatanga ngoikore i raro i a Naahinara.
Copyright © 2015, UMA Broadcasting Ltd: www.waateanews.com