Listen Now: 
August 03, 2015
He aha nga paanga o te kirimana tauhokohoko o te ao?
Waatea Team
Posted On August 3, 2015
He aha nga paanga o te kirimana tauhokohoko o te ao?
He aawangawanga no te tokomaha kei paakinotia a Aotearoa e te kirimana tauhokohoko o te TPP.
E mea ana a Nanaia Mahuta o te roopu Reipa ka korero puku nga kaawanatanga i nga whakaritenga aa kaahore tatou e mohio ana ki nga kupu hoohonu.
Hai taa Mahuta ano he whaanui te whakawhitinga o nga korero mo te haki engari he iti nga korero kei te rongohia mo te kirimana tauhokohoko ahakoa nui ake ona paanga ki a tatou te Maori.
Kaiwhakahaere reo.
E piki haere ana nga waahine Maori mo te taha ki te korero i te reo Maori kei te tupu haere hoki to ratou mohio ki te whakapapa, ki te maatauranga Maori.
Hai taa kairangahau a Taakuta Tahu Kukutai raaua ko Moana Raarere o te Whare Waananga o Waikato tokomaha ake nga waahine kei te whai paanga ki o ratou marae, ki o ratou iwi.
Hai taa raaua ano kei te kite i te huringa o te ahua wahine mai te kaiwhakahaere i te kaainga ki te kaiwhakahaere i te whaanau whaanui, i te marae hoki.
Whareherehere Maori?
E pai ana me tuuhura he aha nga mea e hiahia ai ki te whakatuu he whare herehere Maori.
Na te Minita Whakatika Tangata a Peseta Lotu Iiga taua korero i korero ki te Paati Maori.
Hai taa Maarama Fox rangatira takirua o te Paati Maori e kore kaahore ka ahei te Maori ki te whakahaere whare herehere waihoki ka pai ake i taa Serco i mahi ai.
I tenei waa kei te korero noa iho i te take nei.
Kura hauora.
Whakatuuria nga whare hauora ki nga kura.
Hei taa kaimahi haapori a Tim Tipene he tino whakatuma te tuukino, te koohuru ki o tatou kaiwhakahaere toa hokohoko kaahore e pai ana te huringa o etahi tamariki ki te whakamatemate taangata.
Hai taa Tiipene ano tokomaha nga tamariki kei te tuuwhera ki tera momo hee na reira me aarai i te takanga pera o a tatou tamariki mokopuna araa ki te takere o te pari.
Ka mutu ka noho mataku te maha o nga kaipupuri toa kei patua ratou mo te kore noa iho.
He ngaakau manawapaa mo te puuhiko.
Kei te matakana te Minita Maori a Te Ururoa Flavell ki te karanga a nga piriihimana i tera wiki ka hoatu ki o ratou aapiha haere huarahi ko te puuhiko taser hai whakaruruhau i a ratou.
Hai taa Flavell kei te mau kee i a ratou nga puu mataa me nga puu hiko ki o ratou waka.
Ki a ia ano he mea nui ki te tiaki i o tatou aapiha engari kua kite kee i nga puhinga poka noa.
Copyright © 2015, UMA Broadcasting Ltd: www.waateanews.com
RELATED NEWS
