Listen Now: 
Kia kooataata i te korero.
Ko wai ka mohio ki te tika o nga korero haakirikiri a te kaawanatanga e paa ana ki te kirimana tauhokohoko o te TPPA.
Hai taa Meka Whaitiri mema paaremata o te Ikaroa Raawhiti kei te korero puku te kaawana ki etahi Maori mo te kirimana raa engari kaahore ratou e korero ana ki etahi atu.
I te mutunga o te raa hai taa Whaitiri ano horekau he raruraru o nga kirimana tauhokohoko ko te aawangawanga kee ko te hokona atu o to tatou mana motuhake ki nga kamupene nunui i taawaahi.
Kiingi rangahau hauora.
He kaha te paanga o nga whaanau Maori ki to ratou taha Maori.
Koia tetahi kitenga o Taakuta Te Kani Kiingi i tana rangahau ki nga ahuatanga e tautoko ai i te tupu o nga whaanau.
Aaapiti atu he mea nui tonu te whanaungatanga me te manaakitanga.
Te mea kee ko te nuinga o nga whaanau Maori kaahore e kaha whakapono ana ki nga piriihimana, ki nga kooti, ki nga puunaha o te hauora, o te maatauranga hoki.
Ko te whaanau te mea nui.
Ko te oranga o nga whaanau te mea nui kia tuu tangata ai tatou i tenei ao hurihuri.
Koia tetahi o nga tirohanga nui i te puurongo kua tukua mai e te Tari Whakarite Kaupapa Paapori e paa ana ki te tuu a nga whaanau i te tau 2015.
E mea ana te tari raka ko te whaanau te puutaketanga o nga mea katoa engari he maha nga whaanau i tenei waa e kore taea te tuuranga tuuturu o te whaanau te whakatutuki.
Te ao matihiko.
He aha te whakautu a te Maori ki te whakapaakehatanga o nga kohi raraunga?
E mea ana a maatanga matihiko a Karaitiana Taiuru me whakahoki korero te Maoriki te whakatuma e korerohia nei taa te mea kei te matihikotia nga mohiohio me nga raraunga
e nga whare pukapuka, e nga tari kaawana, e nga kamupene nunui kaahore he paanga ki te Maori.
Kua whakatuuria he roopu i tenei wiki ma ratou e korero mo etahi tikanga whakahaere e paa ana ki te ipurangi.
He pehea te whakautu?
Te hanga nei he ngoikore te whakautu a te Maori ki te hiahia kia whakaritea he haki hou mo Aotearoa.
Hai taa Hana O'Regan o Ngai Tahu ko ia tetahi o nga mema o te poari arotake i te kaupapa na te tokoiti kua tae atu ki nga huihuinga ko te wai ka mohio ki te tika o te huarahi whakawhiti korero kei te whaaia.
Hai taa O'Reagan ano kua roa kee te Maori e korerorero ana mo nga haki engari ki nga kitenga o te waa ko te ipurangi te waahi ianaianei kei reira tatou e whakatakoto ana i a tatou korero.
Te whakakotahitanga o nga waahi ipurangi.
Kua huri te Taura Whiri i te Reo Maori ki te whakakaha i tona paanga ki te ipurangi.
Kua whakahoungia aa ratou whaarangi e whaa kia kotahi te waahi ipurangi araa te taurawhiri.govt.nz
Kei reira ka whai rauemi mo te wiki o te reo Maori a te 27 o tenei marama.
Hai taa tumu whakarae o te waa a Tuehu Harris kua whakaritea taa ratou waahi ipurangi kia taea ai te whakapiri atu ki Te Taura Whiri ahakoa kei hea koe e noho ana.
Copyright © 2015, UMA Broadcasting Ltd: www.waateanews.com
RELATED NEWS
