Listen Now: 
Ururoa kei Poihaakena.
Hai apopo ka tuutaki atu te Minita Maori a Te Ururoa Flavell ki nga rangatira o nga haapori Maori kei Poihaakena e noho ana.
Aapiti atu ka haere hoki ia ki tetahi hui oohanga mo iwi taketake aa ka tatuu ia ki te whare e kiia nei ko Koha Shed e aawhina ai i te hunga kainga kore.
Hai taa Flavell ka totoro atu ki era o tatou i huunuku ai ki whenua kee ki te rapu oranga mo ratou me o ratou whaanau.
Hikareti hou.
E hia kee miriona taangata kaipaipa huri noa te ao kei te huri atu i te tuupeka ki te taputapu hou e kiia nei ko te hikareti e cigarette.
E ai ki nga kairangahau he huarahi taua hikareti hou kei te hiikoitia whaanuitia na te iti o te utu, na te iti hoki o te paitini ki roto i aua momo paipa.
Kaati e kii ana te hunga kua momi paipa i te ao, i te po kua huri to ratou ao me to ratou hauora no te piringa ki te e cigarette.
Tikanga Waipiro
Whakaaturia nga painga o te tikanga kia aukati te hoko waipiro ki taatahi, ki nga waahi taakaro ki hea ranei.
Kua arotake te Kaunihera o Taamaki i te tekau maa whitu o nga waahi i reira e aukatingia ana te hoko waipiro te nuinga o aua waahi kaahore e paakinotia e nga whanonga haurangi.
Heoi ano hai taa Paul Majurey tiamana o te Kaahui Maunga o Taamaki kaua hai hiki i nga raahui waipiro ki nga tuupuna maunga o te rohe, kei tuukinotia aua waahi motuhake.
He kirimana moorearea?
Kia kaha tono nga kaitono ki te wero i te kirimana tauhokohoko o te ao e mohiotia nei ko te TPPA ma te Taraipiunara o Waitangi.
Ko taa te Karauna he moumou taima kia whakatewhatewha te Taraipiunara i taua kirimana na te mea tera pea ka hainatia i tenei wiki.
Ma te kirimana tauhokohoko nei ka waatea pea nga kamupene o te ao ki te haamene i nga kaawanatanga pena haukotingia a ratou hua puutea e nga kaupapa taiao, e nga kaupapa hauora.
Hai taa Tuurei ano te ahua nei ko taa te Karauna he aarai i te tirohanga a te Taraipiunara ki nga pewheatanga o te waa.
Tautokohia te reo ka tika.
Kia pai ake te tautoko ma reira pea ka ora te reo Maori.
Koia te korero a te Kaikoomihana hou o te Taura Whiri i te Reo Maori a Wayne Ngata.
Hai taa Ngata he whaaiti nga rauemi a te Taura Whiri no reira me whakamahi i nga rauemi kia pai nga hua ka puta.
Hai taa Ngata ano e tika ana me whakapiri atu ki nga roopu whai rawa kei a ratou te hiahia kia ora tonu to tatou reo.
Rotorua whakapiki tauira.
Kua tuu te roopu o te hunga whai rawa e kiia nei ko NEXT ki te tautoko i te kaupapa i Rotorua kia teitei ake te pikinga o nga tauira ki nga kura o te rohe.
Ka whakakotahi i nga momo tikanga whakaako pera i te ako matihiko me te piringa ki te whaanau, ki te haapori.
Hai taa Leith Comer tiamana o Excel Rotorua ka tautokohia nga tumuaki me nga kaiako e aarahi ai i te huringa o te huarahi ako ki o ratou kura.
Copyright © 2015, UMA Broadcasting Ltd: www.waateanews.com
