Taa Pita hiikoi hou
Ka rapu huarahi hou a Taa Pita Sharples hai ara hiikoi moona ahakoa tona mutunga i Paaremata.
E mea ana a Taa Pita kua whakawhiwhia ki te hoonore taa, ko te huringa o te titiro a te kaawana ki nga kaupapa rawakoretanga tetahi o nga mahi nui i mahingia e tana roopu e te Paati Maori.
Me tana aroha ki te hunga naa ratou ia i tautoko i roto i nga tau ki roto ki waho o Paaremata.
__
Davis hiikoi ma raro
Ahakoa te hekenga o te ua me te pupuhi o te hau.
Kei te hiikoi tonu a Kelvin Davis o Reipa me tana roopu tautoko kia huri te aro o te motu ki nga tuukinotanga raweke tinana.
Kei tua atu o Kaiwaka ratou e para ana i to ratou huarahi.
Me te kii a Davis, e harikoa ana ia ki te whakautu ki te karere o te hiikoi araa, he huakore te tuukinotanga raweke tinana me ona paanga ki nga patunga o era mahi.
__
Kaakaariki kanohi hou
E kii ana te rangatira takirua hou o nga Kaakaariki kua tae ki te waa kia maha ake nga mema Maori i tana roopu.
Kua puta te ihu o James Shaw i te pooti a te roopu Kaakaariki i taa ratou hui a tau.
Hai taana ano, ko te ao hurihuri tenei e tika ana kia kite i nga kanoho Maori Pasifika Hainamana a wai atu ranei e whakataetae ai ki nga tuuranga toorangapuu ki Paaremata, taa te mea kua pakaru te ahua oohanga o Aotearoa.
__
Ruatoria ka whakareerea
Ko te hiahia kia katia te whare puutea o Westpac i Ruatoria, me te kii a te haukaainga ka paakinotia etahi o te kainga me te rohe whaanui.
E mea ana te korero ko nga pakeke ka rongo i nga paanga kikino na te mea
e pai ake ana ki a ratou te haere ki te whare puutea i te paanga a rorohiko ki te ratonga whakahaere.
Hai taa Rauhuia Smith o Ruatoria pena kati i to ratou whare puutea ka rongo hoki a te Wharekaahika, a Te Puia me nga kaainga maha i nga taimahatanga o te haerenga tawhiti ki Tuuranga ki te mahi i nga mahi puutea.
__
Mate wairangi ratonga
Mehemea ki te whakawaatea i te huarahi kia whakakamupene i nga ratonga hauora, ka ngahoro te kaupapa.
Hai taa Annette King o te roopu Reipa, he aha ko te tino kaupapa a taua hootaka a te kaawana, kia whakaora i te tuuroro, kia penapena puutea ranei. Ko taa te kaawana he whakarite i nga hononga paapori me kii.
Kia mahi tahi te kaawana ki nga roopu ki tua o to ratou paanga ki te utu ki te tuku hoki i nga ratonga hai whakapai ake i nga otinga paapori.
Hai taa King ano, he parekura kei te haramai pena waiho ma te hunga whakangao puutea ki te utu i te hauora.
Copyright © 2015, UMA Broadcasting Ltd: www.waateanews.com
