December 11, 2014
Taranaki whenua ngaaueue
Taranaki whenua ngaaueue
Ruu ana te whenua ka mataku te tangata.
Rua rau toru tekau maa ono nga ruu o te whenua kua rongohia i te rohe o Taranaki mai te marama o Pipiri 2013 ki Pipiri 2014.
Koia te kitenga o te roopu rangahau o Geonet koia hoki te tuhinga i taa ratou puurongo puutaiao.
Hai taa ratou ano ahatia te aawangawanga he ngoikore nga wiriwiri i rongohia waihoki he ruarua nga ruu i tukituki i a Papatuuaanuku paatata atu ki te maunga tiitoohea o Taranaki.
Akoranga haapai tauira
E whakahaerehia ana tetahi hootaka ako ki te haapai ake i nga paerewa maatauranga o nga tauira kura tuarua ki a ratou whakamaatautau NCEA.
Ko te Hookioi te iingoa o te hootaka aa he mahinga ngaatahi kei waenga i te Waananga Aronui o Taamaki me te Kura o Hato Peetera.
E mea ana nga kaiwhakahaere kua tirohia nga tauira katoa o ratou painga o ratou ngoikoretanga aa kua huri ki te whakakaha i nga ahuatanga ngoikore nei.
Pire whakatumatuma
Tera tonu pea ka noho tuuwhera a Aotearoa ki nga mahi whakatumatuma a nga roopu o taawaahi na reira e tika ana me whakakaha ake i o tatou roopu puurahorua e aarai ai i nga nanakia.
Koia te korero a Andrew Little rangatira hou o te roopu Reipa. Kua whakahee te Paati Maori ratou ko nga Kaakaariki ko Aotearoa Tuatahi ki te pire whakatumatuma a te kaawanatanga engari hai taa Little ano kei te kite i era ahuatanga huri noa i taawaahi.
Whanau ora
E manawapaa ana nga tari kaawanatanga ki a Whaanau Ora me ona painga.
Koia te whakapae a etahi i runga i te mohio he kaupapa Maori tera aa kua werohia nga ratonga kaawanatanga ki a mahi tahi ki nga roopu Maori ma reira ka whai hua nga whaanau.
Hai taa Te Ururoa Flavell Minita Whanake Maori me mohio nga tari kaawanatanga ki te ahua tuuturu o Whanau Ora a taua waa raa ka maamaa ake te huarahi mo ratou.
Kohanga hui
He nui nga tohutohu kei te korerohia e te roopu e titiro atu nei ki nga tikanga a te Kohanga Reo.
Ka puta i te raa nei aua tohutohu ki mua i te hui a motu ki te marae o Tuurangawaewae.
E kii ana te roopu tohutohu .kia uu tonu te Kohanga Reo ki ana kaiwhakahaere o naianei ma ratou e whakatutuki i nga korero ki te Karauna mo taa ratou tono Tiriti o Waitangi.
Waihoki kia tokoiti ake nga kaiwhakahaere ka tuu tonu a Kingi Tuuheitia raaua ko Iritana Tawhiwhirangi hai poutokomanawa takirua.
Kaati ka tohungia ko Timoti Kaaretu raaua ko Te Wharehuia Milroy ki te Kaahui Rangatira ma raaua e arataki i nga kaupapa e paa ana ki nga tikanga me te reo.
Tuuru Kaunihera
Me pehea e whakatahuri i te ngaakau o te tangata kaahore e whakaae ana ki te whakatuuranga o nga tuuru Maori ki nga Kaunihera o te motu.
Hai taa Meetiiria Tuurei o nga Kaakaariki koia te wero nui me tana whakapae ka nui te tini e whakahee ana i taua whakaaro mo nga tuuru.
Kua kii mai te kaawanatanga waiho ma nga Kaunihera e whiriwhiri me kore ratou e whakarite tuuru Maori.
Heoi ano hai taa Tuurei ano he kaupapa nga tuuru Maori no te whatumanawa tonu ka kore e whakatauhia ma te whakaaro noa iho.
Copyright © 2014, UMA Broadcasting Ltd: www.waateanews.com