Listen Now: 
Moe kino.
Kia haumaru te moe o o tatou peepee ka tika.
Koia tenei ko te rangi kia aronui atu ki te motu ki tera take me te mohio ko nga peepee Maori e tirohia ana na te mea neke atu i te 60 paiheeneti o nga matenga ohotata o nga peepee i Aotearoa he Maori.
Ka mutu e kii ana nga kairangahau ko te kaha o nga maamaa ki te momi paipa me te moe tahi o te peepee ki nga maatua nga ahuatanga whati tata, ka whakatuma i te oranga o nga koohungahunga.
Whare tapere.
Me whakatuu i tetahi whare tapere mo te tangata whenua ki Te Papa Tongarewa Poneke.
Koia te karanga a kaitapere Maori a Jim Moriarty me tana kii taa te mea ka mau i a Te Papa nga taonga a te Maori me whakaroa i te paanga ki nga kaupapa tapere.
Ki a ia ano kei nga roopu toi Paakeha o ratou ake whare i Te Whanganui a Tara kaua e wareware ki nga mahi tapere a te Maori me a tatou korero.
He waahi whakatairanga i te reo.
Ka whakarewa te whare puutea o Aotearoa Credit Union i te tuatahi o nga miihini toha puutea araa ATM machine e whakaritea ai ki te reo Maori.
He ratonga hou, he ratonga motuhake tera kia piri tata ki nga mema.
Ko Te Kohao te iingoa o to ratou whare hou i Kirikiriroa i te marae o Kirikiriroa.
Hai taa Tureiti Moxon kaiwhakahaere o Te Kohao Health te hoa ki a Aotearoa Credit Union mo te kaupapa nei ka tuku ratonga whakahaere puutea ki te tokomaha i Waikato.
He aha te Karauna i pera ai?
Kia pai ake te whakautu a te Karauna ki te puurongo whakamutunga mo te paenga o te kaipuke Rena.
Ki taa te Taraipiunara o Waitangi na te Karauna te wairua o te hononga ki te Maori i takahi na to ratou kuhuna poka noa ki tetahi whakaritenga ngaro me nga kaipupuri o te Rena no konaa tera pea ka mahue te paenga o taua waka ki raarangi toka o Otaaiti.
Hai taa Umuhuri Matehaere o te Mootiitii Rohe Moana Trust kua hapa te Karauna.
He ahurei poroteehi.
Ka tuu kotahi nga roopu waiata Maori pera i a Herbs ki te whakahee i te mahi tuuhura hinu a kamupene Statoil. Kotahi rangi te roa o te ahurei puuoro ki Ahipara a te Raahoroi nei.
Kua whakaritea te hui puuoro raa mo te timata o te hootaka a Statoil ki te whakamaatautau i te takere o te moana atu i te Oneroa a Toohee.
E mea ana te hunga whakahee he mahi tino whati tata kia koowiritia hoohonutia mo te hinu no reira e tika ana me waiata a Herbs araa ko nga tautoohito ki te poroteehi i te huakore o te tuukino taiao.
He roopu tohutohu.
Ka whakatuuria he roopu tohutohu take reo Maori ma ratou te Minita Maori a Te Ururoa Flavell e tohutohu.
Ko taa ratou arotahi ko te tika o te pire reo Maori kia uu ki te hiahia ma nga iwi e aarahi i nga kaupapa hai haapai ake i te reo.
Hai taa Flavell e piripono ana ia ki te whakarite i taua pire kia tika, kia pono.
Hai taana ano he tino pai nga wheeako reo kei roto i te roopu kua tiipakohia ki te tohutohu i a ia.
Copyright © 2014, UMA Broadcasting Ltd: www.waateanews.com
RELATED NEWS
