November 27, 2014
Ka whakato raakau
Ka whakato raakau
Ka whakato raakau Maori ki nga tahataha o te awa o Waipaa rohe o Ngati Maniapoto hai oranga mo te awa, mo te iwi.
Kotahi ira rima miriona taara te tohanga o te puutea a nga tau e toru kei te haramai e tuku atu ai ki te whakatika i te awa ko te Roopu Whakahaere i te Awa o Waikato te roopu tohatoha puutea.
Atu i nga raakau ka whakatuu taipa ki etahi waahi o te awa matua me etahi wai nohinohi.
Nga tauira whiwhi tohu
Kua tutuki pai nga tauira tohu paerua o te Kaareti o Waikato Tainui i a ratou mahi.
Tokowhitu kua whiwhi i te tohu paerua ko te MBA tera aa, i tatuu ki reira ko te Kiingi Maori a Tuuheitia ki te tuku atu i nga tohu ki nga aakonga.
Hai taa Sara Jane Tiakiwai kaiwhakahaere o te akoranga nei ka tiimata ano he hootaka hou a tera atu tau me te huhua o te kaupapa ka taea te tuuhura mai.
Whakarerekeehia te tukanga.
Me whakaroa i te waa kati mo nga tono ki te hanga i nga hootaka Maori.
Koia te karanga a Nga Aho Whakaari he roopu e tautoko ana i nga Maori kei nga mahinga kiriata pouaka whakaata ki a Te Reo Taataki.
Hai taa Kim Muriwai maangai korero o Nga Aho Whakaari he waa kati tera e kore e whakatairanga i nga mahi tika, i nga mahi pai.
Ki a ia ano kaahore e pai ana taua tukanga mo nga kamupene Maori hanga hootaka.
Nga korero whai hua
E whakaatu ana te hui rangahau mo iwi taketake i tenei wiki ki Taamaki Makaurau te hiranga o te korero ma nga kairangahau e whakarite i a ratou ake whaainga nunui.
Kua whakakapi i nga kaupapa whakahirahira ki a iwi taketake i taua hui a Nga Pae o te Maaramatanga kei reira ko nga maangai korero o nga iwi taketake kotahi rau e whakarongo ana, e whakaputa whakaaro ana.
He pire tirotiro.
E tika ana me tuku tono tatou e paa ana ki te pire paaremata ka whakawaatea i nga roopu puurahorua ki te titiro poka noa ki te tangata horekau he whakaaetanga
mo nga haora 48.
Ma taua pire hoki ka waatea ki te aukati i te puka uruuruwhenua o te tangata e whakapaetia ana ki tetahi hononga ki a roopu whakatumatuma.
Hai taa Maarama Fox o te Paati Maori kaahore tana roopu e pai ana ki te whaawhai o te kaawanatanga i te kokiri i taua pire.
Whakatuu kaainga.
Ko te kaupapa e kiia nei ko Kainga Whenua kei te tapepe.
He hootaka aawhina tera a te kaawnatanga e hoatu puutea ai ki nga whaanau mo te hanga whare ki o ratou whenua tupuna.
Tekau maa tahi noa iho nga whaanau kua aawhinatia huri noa te motu.
E ai ki etahi ko Kainga Whenua anake te huarahi hai whai ma te tokomaha e oke ana ki te whakatuu whare mo ratou ahatia he aawangawanga ki te tokoiti kei te tautokohia i tenei waa.
Copyright © 2014, UMA Broadcasting Ltd: www.waateanews.com