November 05, 2014
Teina Pora
Teina Pora
I whaaki a Teina Pora ki tetahi hara koohuru rua tekau tau ki muri ahakoa ehara noona te hara kia aha ai kia whiwhi 50 mano taara hai utu piriihimana. I whakapae nga piriihimana ki te haarakiraki o taua whaaki me nga whakaaro pokaikaha o Pora i tera waa.
Kei mua ia i te Kaunihera Matua o te Privy Council i tenei waa ki Ingarangi koia pea te kaupapa whakamutunga o Aotearoa hai tirohanga ma taua kaunihera a muri atu nei ka tuu kee ko nga kaupapa nunui ki mua i te Kooti Matua o Aotearoa.
Kua puta a Teina Pora ki waho o te whare herehere whai muri i nga tau 21 e mauheretia ana mo te kohurutanga o Susan Burdett.
Kore mahi
Kua heke ki te 5 ira 4 paiheeneti te maha o te hunga kore mahi ahakoa te piki haere o te urunga mai o nga manene o taawaahi ki konei noho ai.
I runga i nga mahi hanga whare i Taamaki me Otautahi 72 mano taangata kua kite i nga tuuranga mahi hou me te kii a nga whare puutea he tohu tino pai tera mo te tupu oohanga o Aotearoa.
Te mea kee he iti tonu te utu puutea ki nga kaimahi kaahore e tupu ana.
He tikanga aukati.
Tera tonu pea 40 taangata kei te tirohia e nga tari kaawanatanga me te whakapae ka haere ratou ki te pakanga ki Syria, ki hea ranei.
E mea ana te Piriimia a John Key ko te mahi a nga tari kia maatakitaki te hunga whati tata araa ko te hunga e whai waahi ana ki nga whanonga kei te toopito o te paapori o Aotearoa kei te tapa o te pari me kii.
Whaangai tamariki
Ka tatuu te pire whaangai tamariki ki tana paanuitanga tuatahi i te raa nei ki roto o Paaremata.
Kua whakaae a Metiiria Tuurei o nga Kaakaariki maana e piikau taua pire i whakaarahia tuatahitia e Hone Harawira.
Hai taa Tuurei ahakoa te pai o nga mahi a te roopu Mana ki te kookiri i te kaupapa whaangai tamariki e korerohia nei i te mutunga ake ko tenei te waa otiraa a te po nei ki te whakatau i te pire, ki te maatakitaki ranei i tana ngahorotanga.
Tohanga rangahau
Ka tohaina te karahipi tohanga puutea o Marsden ki nga kairangahau Maori ki te rangahau i a ratou ake kaupapa whaanui.
Ko te tirotiro whetu, ko nga whakataunga Tiriti o Waitangi, ko te hononga o nga whakaaturanga ahurea ki te ture me te whakakamupenetanga o nga roopu nga kaupapa rangahau aa ka titiro hoki ki te whakaaetanga o nga Whare Waananga kia reo Maori nga tuhinga a nga aakonga.
Piriihimana Maori?
Kia kaha ake te tari Piriihimana ki te whakararata i nga Maori na te mea i tenei waa 11 paiheeneti noa iho o nga aapiha, he Maori.
Koia te whakahau a piriihimana o mua a Steve Elers o Ngati Kauwhata ko nga tikanga whakatairanga ki runga pouaka whakaata te mea nui waihoki kia auau te whakaaturanga o nga aapiha Maori, kia kite ai nga rangatahi he mahi hoki tera ma te Maori.
Copyright © 2014, UMA Broadcasting Ltd: www.waateanews.com