Listen Now: 
Tainui whakahou anga
Ka timata i te raa nei te pooti a Waikato Tainui mo tetahi anga whakahaere hou.
Ko te hiahia kia tau ai te hononga o nga roopu whakahaere o te iwi whaanui ahatia nga whakaritenga ka whakamaaramatia te ahua o nga mahi ma tena peka, ma tena peka o ratou tuuranga, o ratou haepapatanga a muri atu nei. Ka mutu te waa pooti hei te mutunga o tenei marama.
Pou Matakana takitahi
Ka rapu puukenga te kaahui matua o Whaanau Ora kia kite ai ko nga roopu e ahei ana ki te mahi tahi ki te whakatupu i te ahua o nga whaanau.
Hai taa Merepeka Raukawa Tait te tiamana o te peka toha rawa e kiia nei ko Te Pou Matakana kaare he take o te mahi tautauaamoa engari me mahi ngaatahi nga roopu katoa ki a ratou.
Hai taana ano a muri atu nei, ka ine i nga painga o nga hootaka aawhina i runga i te ahua o nga otinga.
Ururoa Minita Whakatupu
Kua hoatu ki a Te Ururoa Flavell te tuuranga tiketike hei Minita mo te Tupu o te Maori maana hoki e piikau i te mahi hai Minita Whaanau Ora, hei Minita Tuarua hoki Take Whakatupu Oohanga.
Hai taa Flavell he mea nui kia noho tonu te Paati Maori hai waahanga o te Kaawanatanga aa ka arotahi ia ki te whakatenatena i te Maori ki te whai waahi ki te tukanga pooti.
Atu i tera e piripono ana ia ki te whakamahi i nga rautaki Maori ki roto i te ao hauora.
Horekau he hiko
Ka kore tonu he hiko i te maha o nga kaainga i Taamaki Makaurau whai muri te kaapura i tetahi teihana iti inanahi.
85 mano kaainga i noho hiko kore inanahi 18 mano kei te noho ano i te poouriuri i tenei raa.
Hai taa te kamupene hiko o Vector a te po nei, hai apopo ranei ka whakakaa ano i te hiko ki taua tini manomano.
Kaati ko Remuera ko Oraakei ko St Johns nga takiwaa e paakinotia ana.
Te waariu whare
Kei te aata poonotinoti te tupu o te waariu ki nga whare otiraa te waariu ine waenga huri noa te motu.
481 mano taara te utu ine waenga ki te hoko whare i tenei waa kei te kite tonu i te tupu o te utu ki Taamaki, Otautahi me Otepoti he pararahi to Tauranga i nga marama e toru pahure atu nei.
Te Kaahui Matua o Naahinara
Kua tukua e te Piriimia te raarangi o ona taangata i tana kaahui matua e kii ana nga kaiwetewete toorangapu he mea ohorere etahi kanohi.
Ko Chris Findlayson te minita hou mo nga roopu puurahorua ko Jonathan Coleman te minita hou mo nga take o te hauora.
Ko huri a Anne Tolley hai minita whakatupu oohanga ko Peseta Sam Lotu Liga te minita hou mo nga take whakatika tangata ka noho tonu a Hekia Parata ki te whakahaere i nga kaupapa maatauranga.
Copyright © 2014, UMA Broadcasting Ltd: www.waateanews.com
RELATED NEWS
