Listen Now: 
Parau whenua he poroteehi huumaarie.
Ka whakahee etahi hapuu o Te Ati Awa i te whakataunga Tiriti o Waitangi o to ratou iwi engari he rerekee te ahua o te poroteehi.
Kua huri a Otaraaua ratou ko Ngati Tawhirikura, ko Manukorihi ki te parau i etahi whenua i Waitara. Kei te taarua i nga tikanga whakahee
i whakatauiratia e Te Whiti o Rongomai raaua ko Tohu Kaakaahi i te waa i a raaua e whakahee huumaarie ana i te raupatutanga o te whenua i Taranaki.
Hai taa maangai korero a Donna Eriwata ahakoa nga aawangawanga o te kaunihera ki a ratou mahi parau oneone ka haere tonu te mahi.
Nga korero toorangapuu i te tonga.
Te hanga nei e pai ana te tautoko mo te Paati Maori i te rohe pooti o te Taitonga.
Koia te korero a to ratou tangata i reira a Ngaire Button i tana korero ki nga kaitautoko i Wairau inanahi.
E kii ana a Button kua maarama ki te iwi he kaupapa nui a Whaanau Ora ma te Paati Maori te roopu e kookiri kia ora tonu ona painga.
Hai taa Ngaire Button ano ko te tikanga kia whakakipakipa i te iwi, i te hapuu, i te whaanau, otiraa ma tatou to tatou huarahi whakamua e whakarite.
Otautahi, ka hoki nga mahara ki te tau 2010.
E whaa tau te roa no te waa o te ruu tuatahi i Otautahi 7 ira 1 tona kaha.
Koia te timatanga o nga wiriwiri whenua ahakoa horekau he tangata i mate i te 4 o Hepetema 2010 he rerekee i te ruu ono marama i muri mai.
Ka hoki nga mahara o te haukaainga ki te tatuunga tuatahi o Ruuaumoko ki a ratou ki etahi he whakatuupato tera kiihai i aronuitia.
Ka mutu kei te rongohia tonutia nga paanga o te ruu ka nui te tini i wehe atu ki waahi kee, ki whenua kee.
Taake, he kaupapa nui.
E whakatairanga ana nga roopu toorangapuu i a ratou kaupapa taake ko te hiahia kia whakapoapoa i te hunga pooti.
E korero ana a Naahinara mo te tapahinga o te taake ko taa Reipa he whakaraapopoto i taa ratou mahere mo tetahi taake ki nga kaipupuri whare maha.
Kaati e mea ana te tokomaha kaare he take o nga whare maha mo te tangata kotahi, mo te whaanau kotahi he tikanga mahi moni noa iho tera e whakapeehi ai te maakete hoko whare.
Kua pai etahi roto, kei te paru tonu etahi atu.
Kua hiikina te whakatuupato mo te ahua o te wai ki te roto o Whangape kei te raki maa uru o Raahui Pookeka.
Ki nga korero o te waa kua heke te hanga paitini o te wai ki raro i te taumata moorearea e whakatuupatoria ai e te tari hauora.
Ko Whangape te roto nui ake o nga roto i te rohe o Waikato engari e rua ano nga roto ko Rotoroa raaua ko Waikare kei te aukatingia tonutia.
Kaati ko taa te Kaunihera a rohe o Waikato kia rite tonu te whakamaatautau i nga roto o te takiwaa whaanui.
Te tirohanga ki nga kaupapa Maori.
E tika ana me mahi tahi ki nga iwi o Taamaki Makauranga kia kaha ake te tuu a Taamaki Makaurau.
Koia te tumanako a Len Brown koromatua o te taone nui nei hai taana ka whakatairanga ia i nga kaupapa Maori me tana kii ko te tuuranga o te Maori i Taamaki he whakahirahira rawa.
E mea ana ia ka whakapau kaha te Kaunihera ki te tautoko i nga marae o te rohe aapiti atu hei te roanga o te waa ka whakatuu i tetahi whare Maori, he whare ahurea
hai whakaatu i nga tikanga a iwi no te mea ko Tamaki te tino taone o te ao kei konei nga iwi katoa o te Moana Nui a Kiwi e noho ana.
Copyright © 2014, UMA Broadcasting Ltd
RELATED NEWS
