February 18, 2014
Taurima kua heke.
Taurima kua heke.
Kua heke ano a Shane Taurima kaiwhakahaere Maori o te Reo Taataki i tana tuuranga ko te paanga ki a Reipa te take.
E ai ki nga korero i whakarite hui toorangapuu a Taurima i tana waahi mahi.
E mea ana a Te Reo Taataki he tino hee tera to Taurima na reira e kore e taea te pupuri ki tana tuuru mahi.
E whakapae ana ka rapu tonu ia i te whakaiingoatanga a Reipa mo te tuuru o Taamaki Makaurau ka kati hai 28 o Huitanguru.
Ko te pooharatanga tonu he raruraru nui.
Kia tuupato kaua tatou e whakataa na te pai o nga tatauranga o te waa.
Koia te whakahau a te roopu aawhina haapori o te Salvation Army ki nga kaiwhakahaere o te Kaawanatanga.
Kua piki maarika te maha o nga tauira Maori e whiwhi ai o ratou tohu NCEA engari e mea ana te ope whawhai pooharatanga nei ahatia nga korero pai mo te taha maatauranga he kino tonu nga kupu mo te noho poohara o nga tamariki me te tuukinotanga ki nga whaanau.
Ngapuhi whai whakatau.
E whakaaetia ana te Kaawanatanga ki te mana o Tuuhoronuku te roopu o Ngapuhi e tautokohia ana e te Ruananga o tera iwi otiraa ma Tuuhoronuku e whakarite ai te whakataunga o Te Paparahi o Te Raki.
Hai taa Sonny Tau te tiamana o Ngapuhi ka pootihia tetahi poari hou a nga marama e tuu mai nei.
Ko taa Tau ano te mea kee kua tautokohia keetia te whakatau a te Kaawanatanga e tetahi kaunihera kaumaatua o Ngapuhi.
Te hootaka mahi hiko a nga Kaakaariki.
Tera tonu pea e kore e paingia te hootaka mahi hiko a te roopu Kaakaariki.
Koia te whakapae o te waa mo tera tumanako kia whakatuu moana hai hopu i nga hihi o Tama nui te raa.
E mea ana te hunga whakahee i tera whakaaro ka kawea tera momo hiko i taawaahi na te kaha o nga kaawanatanga ki te tautoko i nga hootaka moana hopu hihi koira ka puta te ihu o era kaupapa.
Kaati hai taa Naahinara hai te mutunga o te raa he nui ake te utu o te hiko hopu hihi i etahi atu momo pera i te hiko hopu hau, i te hiko koromamao, i te hiko wai ranei.
Nga tamariki noho tuuwhera, whati tata.
Pehea kee te oranga o nga tauira whati tata?
Koia te paatai a etahi kaihautuu maatauranga me te kii ka nui ake te hiahia o era aakonga kei te oke ko ratou te raruraru ehara kee ko nga tauira e hau atu ai ki nga kura hourua, ki nga kura motuhake ranei na reira kaua hai whiu i te nui o te puutea ki a ratou.
Na reira te maha o nga tumuaki e kii ana te hanga nei kua mahue ki tahaki nga kura e haapai ake ai nga aakonga e peehia nei e nga raruraru huhua.
He aituaa
He aituaa kua hinga a Taakuta Nin Tomas o Te Rarawa me Ngapuhi he kaikauhau i nga take o te ture i te Whare Waananga o Taamaki Makaurau 50 ona tau.
I whakapau tona kaha ki te tautoko i nga roopu Maori me nga tauira ako i whai ai o ratou tohu maatauranga.
Kei te marae o Waipapa i te Whare Waananga o Taamaki a Nin Thomas e takoto ana, hai apopo ka kawea ki Pukepoto paatata atu ki Kaitaia.
No reira e te pou o te ture takoto mai, takoto mai, moe mai raa.
Kura hourua i te raki.
E rua nga kura hourua kua tuuwheratia i tenei wiki ki te Taitokerau aa he nui nga tumanakotanga o nga haapori.
Ko Te Kura Hourua o Whangarei Terenga Paraoa tetahi o aua kura hai taa pouwhakahaere Nathan Matthews te tikanga kia whakarite huarahi maatauranga hai whai atu mo nga rangatahi Maori.
Hai taana ano ahakoa nga whakapae a etahi ehara i te mea he kura whakatupu hoia tana kura.
He taura here pai.
Kei te kite i te tupu ki te hononga i waenga i a Ngai Tatou me nga iwi o te ao.
Kua huri te maangai korero a Haina i nga rohe o Waikato me Taamaki ki te whakatoo raakau hai whakamahara ki tera piringa motuhake i tana tatuunga ki te marae o Ohaaki Raahui Pookeka inakuaraa.
Hai taa Ricky Maipi kaiwhakatupu pakihi o te roopu e kiia nei ko te Te Riu o Waikato he tohu mothake tera o te taura here tangata i waenga i nga iwi e rua.
Copyright © 2014, UMA Broadcasting Ltd