January 29, 2014
Kaare he take o te amuamu.
Kaare he take o te amuamu.
Kaua e amuamu na te mea ko au tetahi o nga mema pukumahi o te Whare Paaremata.
Koia te whakautu a Hone Harawira rangatira o Mana ki te whakapae a te Piriimia a John Key ko Harawira tetahi mema kei te takahi te mana o paaremata na te auau rawa e ngaro atu ana.
Hai taa Harawira ano kua kaha whai ia i nga tikanga a te whare e kore ia e karo i nga here na reira horekau he kiko o te amuamu a Key.
Whakakiingia nga tikanga aarai.
Kia kaha ake nga tikanga ki nga kura hai aarai i nga kaimahi raawekeweke tuukino tamariki.
Koia ano te karanga a te Tari Arotake Maatauranga me te kii he ngoikore etahi kura ki te whakatewhatewha i nga whakapae e whiu ai ki nga kaimahi.
I tohungia te tari arotake ki te tuhi puurongo whai muri i nga kaupapa moorikarika i tera tau e rua nga kaihara raweke tamariki i hopukia ko tumuaki tuarua a James Parker o Te Taitokerau tetahi.
He taonga te tamaiti.
Ono tekau taara ia wiki te utu o te hootaka utu tamariki a te roopu Reipa aa e whakapae ana nga kaitaatari oohanga he maha ake nga peepee ka puta mai na runga i nga paanga o taua kaupapa.
E mea ana etahi he momo takoha tera hai whakahauhau i nga takirua huri noa ki te whakawhaanau tamariki.
Kaati ki etahi he take toorangapuu tera ka tautohenga ma nga roopu katoa.
Raumati pai te mahana?
Kua hoki mai te ahua o te raumati ki etahi rohe o Aotearoa ko etahi atu rohe e tatari tonu ana.
Heoi ano he tino aawangawanga te korenga o te ua ki nga kaiahuwhenua.
Ko nga kaipaamu o Waitaha, te Taitokerau, Otautahi me te Matau a Maaui kei te maaharahara ki nga tohu a Taawhirimaatea me te wehi kei pakapaka te whenua.
Hei apopo ka kite i te ua koopatapata noa iho ki nga rohe i te raki o te Ika aa Maaui.
Tirohia nga rautaki haukoti i te whakamomori.
Kia kaha ake te tautoko ki te rutu i te taumata tiketike o nga Maori e huri ai ki te whakamomori, ki te whakamate i a tatou ano.
Koia te iinoi a CASPER tetahi o nga roopu e whakapau kaha ana ki te aarai i te whakamomori i Aotearoa.
Hai taa te roopu raa e piki haere ana te rahi o nga mate Maori horekau he hekenga o te kaute kino nei e kite ana.
Oati ki roo Paaremata.
Kua whakatakoto a Joanne Hayes o Manawatuu i tana oati ki mua o Paaremata.
He wahine Maori ia aa kei te kuhu atu ki Paaremata i te raarangi o Naahinara whai muri te hekenga o Katrina Shanks.
He heamana o mua a Hayes o te pekanga o Naahinara i te Papaioea ka korero i tana kauhau tuatahi ki roo Paaremata i te ahiahi nei.
Kaati i korerohia tana oati i te reo Maori ka noho i tetahi o nga tuuru ki muri o te whare.
Copyright © 2014, UMA Broadcasting Ltd