December 19, 2013
Nga rautaki Piriihimana
Nga rautaki Piriihimana
Ko te tikanga kia neke whakawaho nga Maori ki tua o te puunaha ture.
Koia tetahi rautaki a te tari Piriihimana i tenei waa hai taa Wally Haumaha kaiwhakahaere o nga ratonga Maori Pasifika kei te mahi tahi me nga roopu haapori
ki te rapu i nga huarahi atu i te mauheretanga o nga taangata mo nga hara iti.
Hai taa Haumaha ano o te hiahia kia paparua nga kooti kaumaatua kei te whakahaerehia i Poneke ki etahi atu rohe o te motu.
Te wenerau a nga hoamahi.
Tu mai etahi o te Kaunihera o Taamaki te wenerau a te maha i tenei raa ki te whakaputa i te pouritanga ki nga mahi a to ratou koromatua a Len Brown.
E whakapae ana ka whakapaaha a Brown ki te Kaunihera a muri atu tera pea ka heke i tana tuuranga tera pea ka karanga mai tana hiahia ki te tuu tonu.
He nui tonu nga ahuatanga kei te taarewa pera i te utu nui mo te noho hootera me ana korero waea puukoro.
He iti te utunga
E mea ana a George raaua ko Damien Nepata kua whakareerea raua e te tari wawao a Tumatauenga.
Kiihai te tari i whakaae ki te tono a te tokorua kia whiwhi utunga raaua mo o raaua whara moorikarika i taupuatia i te waa i a raaua he hoia.
Ko taa Jonathon Coleman Minita Wawao ahakoa te tohutohu kia tuku puutea aawhina ki te tokorua raa kua whiwhi kee raaua i nga tohanga puutea a ACC me te tari wawao.
Heoi ano ki etahi atu kua tuukinotia nga Nepata e nga taangata whakaaro matapiko, aroha kore.
He pehea te hauora o te reo?
He wehi no Ngai Tahu kei ngaro to ratou reo a iwi i te rohe whaanui o Waitaha.
Ki nga tatauranga o te waa 12 paiheeneti o nga Maori i reira e ahei ana ki te korero i te reo.
Hai taa Hana O'Regan kaiwhakahaere o Te Puna Wanaka ehara i te mea he tatauranga ohorere tera ki a ia.
Hai taana ko te nuinga o tana iwi kaahore e whai ana i te huarahi ki te ako i te reo.
Ki a ia me whakangao i nga rawa katoa ki nga maatua rangatahi ko ratou nga kaipupuri reo o apopo.
Te oohanga o tenei whenua kei te pai.
Mehemea ka tupu maarika te oohanga o Aotearoa kia tika te tohanga o nga hua ki te katoa.
Koia te korero a Shane Jones maangai mo te tupu o nga rohe a te roopu Reipa.
Hai taa Jones ki nga matapae o te waa ka piki haere te oohanga o Aotearoa a nga tau kei te tuu mai tera pea ka hoki mai etahi whaanau i Ahitereiria ki te kaainga.
Engari hai taana ano he nui tonu nga taimahatanga ki nga rohe aa kei te tupu haere te aaputa i waenga i a poohara me whai rawa.
Ki a ia he kaupapa tera hai korerotanga i te Koowhiringa Pooti a tera tau.
Ruurawhe te tangata hou a Reipa mo te uru.
Kua whakatuuturuhia te iingoa o Adrian Ruurawhe te kaiwhakataetae o Reipa mo te rohe Maori o te Taihauaauru i te Koowhiringa Pooti a tera tau.
Ko ia te tiamana o mua o Ngati Apa aa he tata ana hononga a whakapapa ki te haahi Raatana.
Kei te whakahaere ia i tetahi whare rangahau i Whanganui.
Hai taa Ruurawhe e kore ia e tuu ki te raarangi o Reipa i te mea e piirangi ana i te tautoko o te rohe pooti.
Copyright © 2013, UMA Broadcasting Ltd