December 16, 2013
Tipa 28 Bn
Tipa 28 Bn
I te raa nei kua tanumia tetahi o nga moorehu o te roopu 28.
Ko Tom Tipa tera o kamupene D no te Waipounamu, Wharekauri me te Moana Nui a Kiwa nga hoia o taua kamupene.
Ki nga korero a ona hoa pakanga he tangata huumaarie, he kaha ki te whawhai, ki te mahi.
Atu i a Tipa, kotahi anake te hoia o kamupene D e ora tonu ana ko Henry Norton tera.
Kaati, ka tanumia a Tom Tipa ki tana rua whakautu i te raa nei ki Timaru.
Waipiro kore
Kia waipiro kore nga whaanau i te Kirihimete e tuu mai nei.
Koia te tuumanako o te Mana Ririki te roopu Maori e korero ana mo nga motika tamariki.
Hai taa te roopu raa ka kino ake nga mahi tuukino i nga hararei e ai hoki ki nga rangahau ko te waipiro, ko te tarutaru nga puutaketanga o te raruraru.
Hai taa ratou ano mehemea ka tangohia era ahuatanga ka huri te aro ki nga tamariki.
Horekau he raruraru
Ahakoa nga whakahee a etahi kei te kookiri tonu te mahi hai hanga i tetahi kura hourua i te Taitokerau.
Hai taa Tracey Martin maangai take maatauranga o Aoteroa Tuatahi kua pau te puutea mo te hanganga i te Kura Hourua o Whangaruru i konaa ka whakatuuria nga whare iti hai ruma ako.
Heoi ano hai taa Natasha Sadler te kaiwhakarite marautanga o te kura e poohauhau ana nga whakaaro o Martin e tika ana me hau atu ia ki te kura ki te tirotiro i nga mahi.
Ruu whenua
Kua ruu te whenua i Murihiku i tenei ata.
Ono ira rua te kaha o te ruu, rua tekau maa rima kiromita te hoohonutanga ki te uru o Tuataapere.
I rongohia te wiriwiri i etahi takiwaa o Poneke heoi ano ki taa te tari Piriihimana kaore ano ratou kia rongo i nga korero mo te pakarutanga horekau he korero i rongohia mo te whara ki te tangata.
Kia pai ake kore a muri atu nei.
Kia kaha koe ki te whakatika i a koe.
Koia te karere a te nuinga o nga Kaikaunihera ki a Len Brown koromatua o Taamaki Makaurau inanahi.
I tuu a Brown ki te whakapaaha ki nga Kaikaunihera i te po raa i taa ratou hui.
Hai taana he nui te mahi kei mua i a ia ki te whakatupu i te whakapono o ana kaimahi ki a ia whai muri ana mahi puuremu kua whakapaahotia ki te motu me nga ahuatanga e karapoti ana i tera kaupapa.
Pooharatanga
E ai ki te Kaunihera Karaitiana o nga Ratonga Paapori i Aotearoa kei te patua kinotia te Maori e nga paanga o te pooharatanga.
E mea ana te roopu raa i taa ratou puurongo kua tukua mai ka nui te tini o nga Maori taane mai, waahine mai kaore ano kia whai mahi, kia kuhu ranei ki tetahi akoranga whai puukenga.
Koni atu i tera kei muri te piki o te utu penehana i te pikinga o te utu mo te kai, te utu noho whare me te hiko.
Copyright © 2013, UMA Broadcasting Ltd