December 06, 2013
Hauaauru
Hauaauru
A enei raa whakataa ka whiriwhiri te Roopu Torangapu Maori i to ratou tangata hou mo te tuuru pooti o te Taihauaauru.
E ono taangata ka tuku tono kia piki tuuranga mo Taariana Tuuria ka heke a tera tau.
Ka karangahia te iingoa o te tangata hou a te Raatapu.
E whakapae ana ka tuu a Adrian Ruurawhe o Ngati Apa mo Reipa me te korero he whakataetae tata kei te haere ake mo taua rohe.
Tiriti
Kaua hai whakauru i te Tiriti o Waitangi ki tetahi ture matua o Aotearoa.
Koia te korero a te Roopu Kaupapa Ture i taa ratou puurongo na te mea kaahore te haapori whaanui e tino maarama ana ki te ahua o te Tiriti me ona tikanga.
E mea ana ratou me huri te Kaawanatanga ki te whakatairanga i te Tiriti ki nga kura, ki nga haapori o te motu.
Koni atu i te raa kua whakaheengia te hiahia o etahi ki te whakakore i nga tuuru toorangapuu Maori.
Hai taa Shane Jones o Reipa ka koopiri te Maori ki te Tiriti ahakoa nga korero a tena roopu, a tena Kaawanatanga.
Kura koohungahunga
I tenei raa ka tuu nga kaiako kura koohungahunga ki te whakahee i te tapahinga o te puutea ki o ratou kura.
Ka whakarewa i taa ratou kaupapa ko Green Day of Action te iingoa kua totoro atu nga kaiako ki nga mema paaremata huri noa ki te whakapuare kanohi ki nga paanga o te poro puutea.
Hai taa peretini o te Riu Roa araa o te NZEI a Judith Nowotarski he kaupapa taa ratou hai whakaarotanga mo nga kaiwhakarite o te ture kia uu tonu ki te taumata tiketike o nga mahi ako.
Te wahine
Ko wai nga tino waahine Maori i te ao pakihi o Aotearoa?
Koia te paatai a te Kaahui o nga Roopu me nga Pakihi Maori e kiia nei ko FOMA.
Ka whakaritea he tohu hou mo nga waahine aa i whakamohiotia mai tera ahuatanga inanahi i te hui o nga waahine rangatira Maori i Poneke.
Heoi ano i paa atu nga rangatira i taua hui ki nga mohiotanga mo te whakangao puutea, mo te whakahaere rawa, mo te whakatupu oohanga.
Te Aute
Kua tooia te haahi Mihingare ki roto i te kaupapa mo te oranga o te kura o Te Aute.
Kua tapepe taua kura mo te taha ki te puutea i roto i nga tau na te mea ko nga whenua i whakatahangia ma ratou i riro i te Karauna.
Heoi ano kua uru atu nga mema o te Poari o te Kaareti o Hato Hoani hai kaitiaki o Te Aute me te kura o Hukarere.
Hai taa Piihopa Brown Tuurei kua tae ki te waa kia tahuri te haahi ki te aawhina i nga kura Maori nei.
Copyright © 2013, UMA Broadcasting Ltd