December 05, 2013
Kia tuupato ki a Ahitereiria
Kia tuupato ki a Ahitereiria
Kua whakatuuturuhia te whakapae a etahi ko Ahitereiria te tino aarai ki te tupu o te Maori i Aotearoa.
Koia te korero a Shane Jones o Reipa i runga i te mohio 20 paiheeneti o nga Maori katoa kei Ahitereiria e noho ana.
Hai taa Jones ka whakararata o tatou rangatahi i nga rama piiataata o Poihaakena me nga taone nunui.
Hai taana ano pena hiahia tatou ki te huri kooaro i te tai e rere atu ana ki tera whenua me whakarite kaupapa nui i te kaainga hai paataritari i o tatou taangata kia hoki mai.
He aawangawanga te heke o etahi.
Ka nui te aawangawanga o etahi kairangahau maatauranga ki te piki haere o nga tamariki e hiirorirori ana i te kura.
Kua kitea tera ahuatanga taimaha i roto i te raarangi o nga korero a nga whenua o te ao mo o ratou tamariki.
Te hanga nei e tupu haere ana te aaputa i waenga i nga aakonga kei runga ake me nga aakonga kei raro rawa.
I te mutunga ake ko Aotearoa tetahi o nga whenua e rua noa iho o te ao katoa ka herea te tupu o te tamaiti i te kura ki te hauora a puukoro otiraa te mana a puutea o tana whaanau.
No wai te whenua?
Kaahore e pai ana kia whakahoki tetahi whenua tupuna ki a Ngati Tuu he hapuu o Taranaki
Koia te whakatau a te Kooti Whenua Maori mo tera porohanga whenua 38 heketea te rahi paatata atu ki Manaia.
Ko te roopu Maori o Parininihi ki Waitootara nga kaiwhakahaere i tenei waa otiraa kua whakareerea na runga i nga raruraru o te waa.
Hai taa kaiwhakawaa Lane Harvey ka waiho tonu taua whenua i nga ringaringa o Paraninihi na te mea horekau he mana o te kooti ki te whakahoki i te whenua ki a Ngati Tuu.
Te pakeke kia whakataa.
Ka whakapiki te pakeke mo te whiwhi i te penihana kaumaatua kuikuia kia 67 tau.
Koia te kii taurangi a te roopu Reipa mehemea ki te tuu ratou hai Kaawanatanga.
Hai taa ratou ahakoa he kaupapa tautohenga tera a tona waa ma Reipa e rutu.
E mea ana a David Parker rangatira tuarua o te roopu raa kua tautokohia tenei whakatau i roto i nga kaute a te tari tatauranga i tenei wiki me te tere piki o te pakeke ine waenga o te motu.
Nga kaupapa pai
Ki nga korero o te waa ko te nuinga o nga mema Paaremata kei te tautoko i te whakaroanga o te utu whakataa ki nga maatua ko te nuinga hoki kei te tautoko i tetahi tikanga hai whakamaatautau i te pai o nga whare e reti ana.
E mea ana etahi kaiwetewete toorangapuu he tohu pai, he nekehanga whakaaro ahakoa e noho tonu ana etahi roopu i roto i o ratou rua matapiko.
He tohu maatauranga
Kua riro i a kairangahau Maori Jill Bevan Brown o te Whare Waananga o Manawatuu te Tohu Pae Tawhiti mo aana mahi hai aawhina i nga tamariki hiahia motuhake ki nga kura.
Kua toru tau tana roa e rapu ana i nga huarahi tika ki te whakaako i nga tamariki Maori.
I tuhituhi pukapuka ia e paa ana ki te mate aarai i te ahei o te tamaiti ki te whakawhiti korero e kiia nei ko autism.
Hai taana mai raano ko tana hiahia he tautoko i te hunga e whakatika ana ki te poohara, ki te maauiui, ki te tuukino.
Copyright © 2013, UMA Broadcasting Ltd