November 06, 2013
Te Puni Kokiri ka whakawiriwirihia.
Ki nga korero o te waa ka whakahou, ka whakarerekee i te ahua me te arotahi o Te Puni Kookiri.
Hai taa Pita Sharples Minita Take Maori, me aata titiro te tari raa ki aana mahi, ki tana ahu whakamua.
Hai taa Sharples ano, e tika ana kia whakaatu nga honohononga i waenga i te Karauna me nga iwi,
i tenei waa tonu e huri haere ana te hiikoi ki tua o nga whakatau Tiriti o Waitangi.
Kore mahi, kua taka te kaute.
Kua heke ki te 6 ira 2 paiheeneti te taumata koremahi i Aotearoa.
Te rahi o te takanga nei he korero ohorere ki nga kaiwetewete oohanga.
E ai ki nga korero kua piki te maha o nga tuuranga hou ki nga toa hokohoko, ki nga kamupene tiaki tuuruhi.
Ko Taamaki me Otautahi nga waahi kei te tupu haere, kei te tupu haere i runga i nga mahi whakatuutuu whare.
He ara hoe waka kei te whaaia.
E hoki ano etahi o nga iwi o te Taitokerau ki to ratou awa,
he haerenga motuhake, he awa motuhake ko Wairua tona iingoa.
I nga waa o mua he ara waha kai taua awa, he huarahi mo nga waka o nga tuupuna.
Ko Te Uriroroi tetahi hapuu e kii ana me hoki nga uri ki te awa ka tika.
Kaati inakuaraa i whakaritea he haerenga hou mo nga waka i runga i te awa, me te kii a nga kaiwhakahaere he kaupapa whakahirahira, he mahi rangatira.
He take puutea, he raruraru.
Kua tau te take puutea i wehewehe ai nga pononga a te haahi Mihingare i te Taitokerau.
Tata ki te rima rau mano taara he takoha tuku iho te puutake o te raruraru aa kua whakatauhia e te Kooti Teitei e tika ana me hoatu ki te roopu Mihingare o Paarengarenga Ahipara Peeria taua hua puutea.
Ahatia hai taa Piihopa o te Taitokerau a Kito Pikaahu te tumanako kia noho kotahi ano te haapori i raro i nga manaakitanga a te Runga Rawa.
Ka hoki ano ki te pourewa konohete.
Te ahua nei ka tuu ano te roopu kapa haka Maori o Paatea ki te whakaatu i a ratou mahi waiata.
Ka kite i tera roopu rongonui o tatou ki Haawera hai te mutunga o tenei marama mo nga po e rua.
E mea ana a Janine Marurera kaiako o te roopu raa no te putanga o te kiriata Boy,
kua huri ano te titiro a te ao ki a ratou.
Hai taana ano ka whai i taa ratou e pai ai aa ka tuu hoki etahi o nga kaiwhakakite rangatahi o te kapa ki te whakaatu i o ratou puukenga.
Te pire tirotiro taangata.
Kua pahure te haawhe tuarua o te pire puurahorua a te Kaawanatanga i tana paanui tuatoru inanahi aa ko te whakatuupato o Reipa kei te hee te aronga o Naahinara.
Te tikanga o taua pire kia hoatu nga kamupene waea i nga momo haangarau ki te Tari Puurahorua a te Kaawanatanga mo te whakarongo korero te take.
Hai taa te Kaawanatanga e whakaara ake ana i tenei kaupapa ki te whakaruruhau i te katoa.
Copyright © 2013, UMA Broadcasting Ltd