Listen Now: 
Kei te whiti mai te rama tirotiro.
Kei muri i te awe maapara, he take kee atu.
Koira te whakapono aa ngaa kaimaatirotiro i ngaa take toorangapuu, whai muri mai i te putanga o te ngaa whakapae mo te kahika o Taamaki a Len Brown.
I te timatanga o te wiki nei, i puta ngaa whakapae, i mahi puuremu aa Len Brown.
E ai ki ngaa koorero, e rua tau te roanga o tana mahi puuremu me tetahi wahine, erangi ko te mea kee, noo te taha maatau teenei wahine, naa reira e whakapaetia ana e etahi, he mahere rautaki teenei aa te taha maatau kia taaunu ai te mana o te Brown.
Hei taa Len Brown, kua patua ia e te whakamaa, ka mutu, ka haangai pu tana titiro ki tana hoa rangatira me aa raaua tamariki i teenei waa.
He hui whakamaharatanga
I whakahaerehia he hui whakahirahira ki te Whare Wananga o Tamaki inapo, ko te kaupapa ia, he whakamahara i te urutomotanga o Te Urewera, e ono tau ki muri.
Hei taa Marama Davidson o te roopu Kakariki, tetahi hoki o nga kaikorero inapo, mai ra ano tera momo mahi a te karauna ki a Tuhoe, a, he tohu o te hiahia o te karauna ki te peehi tonu i te iwi tangata whenua o Aotearoa
He Paakeha te rangatira waa poto.
Kua tohua e te Uepu o Whakaata Maori, a Alan Withrington hei tahuhu rangapu mohoa hei whakakii ake i te turanga o Jim Mather ka heke nei a te mutunga o tenei wiki.
Hei taa te upoko o te Uepu a Georgina Te Heuheu, ko Withrington te tumuaki o te wahanga tahua putea o Whakaata Maori i tenei wa, a, kei a ia nga pukenga hei hautuu i a Whakaata Maori, i te Uepu e whakatikatika ana i ana hatepe kowhiri i te tahuhu rangapu hou
He tirohanga whakamua
Hei taa te rangahau hou a te Whare Wananga o Otakou, ki te hiahia a Aotearoa ki te whakatutuki i tona wawata kia auahi kore te motu hei te tau rua mano rua tekau ma rima, me whakamutu e te rua tekau oorau o nga kaimomi tupeka Maori tera mahi ia tau.
Hei taa Tony Blakely, tetahi o nga kairangahau, ka whakapuaki whakaaro te roopu rangahau ki te Hui Taumata Auahi Kore ka tuu ki Tamaki Makaurau a tera wiki, me pehea ra e tutuki ai te wawata kia auahi kore te motu, ko tetahi whakaaro, hei taana, me tino hiki te taake ki runga tupeka
Te whakahokihanga o nga tuupuna
Kei runga waka rererangi nga kaitiaki taonga o Te Papa Tongarewa i tenei wa.
Kei te haere ratou ki Ingarangi ki te kohi toi moko hei whakahoki mai ma ratou ki te kainga.
E ai ki te whare wananga o Birmingham i Ingarangi, ko to ratou hiahia kia hoki atu nga toi moko ki to ratou ukaipo
Ko wai ka mohio ki te karere e korerohia ana?
Kua parea ki raahaki etahi tono amuamu i tukuna atu ki te mana whanonga paapaho, e mea ana taua tono, he kaikiri te whakatairanga pouaka whakataa o Tasti Muesli Bars.
He pakiwaituhi te whakatairanga nei, ka mutu, kei te kaha whakaatuuria ngaa tino o te ahurea o Aotearoa, peenei me te aihe oo Opo.
Erangi e ai ki ngaa tono amuamu i tae atu ki te mana whanonga paapaho, ko etahi o ngaa aahuatanga i kitea, he kaikiri, peenei me ngaa mahi kaitangata aa te maaori.
Hei taa te mana whanonga paapaho, kaaore he kiko i ngaa tono amuamu i tae atu ki a raatou.
Copyright © 2013, UMA Broadcasting Ltd
RELATED NEWS
