October 14, 2013
Kowhiringa Kaunihera o Te Tai Tokerau
Kowhiringa Kaunihera o Te Tai Tokerau
Ahakoa kei te takiwaa o te wha tekau oorau o te Taitokerau he maaori, he tokorua noa iho ngaa kanohi maaori i whai waahi atu ki ngaa kaunihera o teera takiwaa.
Ka mutu ehara i te mea, ko te Taitokerau anake e paangia ana e teenei mate, ko ngaa rohe o te Tairaawhiti, Te Whanganui aa Tara e peeratia ana.
Ehara i te mea, he tokoiti noa iho ngaa kaiwhakataetae maaori i te rohe o Te Taitokerau, erangi e maaharahara tonu ana, i te tokoiti o ngaa kanohi maaori e puta atu ana ki te tuku pooti.
Ko Te Ngawha o Papakura
Kei te koropupuu anoo tetahi ngaawha kua whaa tekau tau aa ia e noho wahanguu ana.
Mai anoo i te tau 1979, kihai te ngaawha o Papakura i Rotorua i pahuu, e ai ki ngaa koorero naa ngaa mahi hiko te raruraru.
Heoi i ngaa tau iwa tekau o teera rautau, i whakakaahoretia ngaa mahi hiko, kia whakarauora anoo ai teera ngaawha.
Hei taa Malcolm Short, maangai mo teenei take, i kitea tuatahitia te huunga o teera Ngaawha e rua wiki ki muri nei.
Naa hei taana anoo, he tino tohu teera, ki te kore ngaa iwi e haumaru ana i aana rawa, he raruraru kei te haere.
Ko Nga Kohanga Reo
Me kaua te maaori e whakaparahako i te maaori, waiho maa tetahi atu taatou e patu.
Koira te whakakipakipa aa te uepu whakahaere i ngaa Kohanga Reo ki ngaa rangatira o Whakaata Maaori.
Kua ara ake ngaa raruraru i waenga i te Kohanga Reo, whai muri mai i te whakapae, kei te whakapau raatou i ngaa putea mo te koretake noa iho nei.
E ai ki ngaa koorero naa te ringa pakihi o Te Kohanga Reo teera puutea e whakapaua ana,
Kaatahi nei te Kohanga Reo ka tuku i tetahi tono ki te kooti, kia kaua a Whakaata Maaori e whakapaaho ana i teenei take.
E ai ki te kooti, kaaore he take o te Kohanga Reo, naa reira, kua whakawaateahia te huarahi maa Whakaata Maaori, ki te aata wherawhera i teenei take.
Kowhiringa Kaunihera
I tuu rangatira ai ngaa kaiwhakataetae maaori o Rotorua i ngaa Kowhiringa Kaunihera.
Noo te Haatarei o teera wiki, i kautehia ngaa pooti, kia kitea ko wai ka hua ko wai ka tohu.
Ana i te aahua nei, ko te kaunihera aa rohe o Rotorua te tino waahi kua mahuta ake ai te kanohi maaori.
I riro ia Steve Chadwick te tuuranga Kahika o Rotorua, erangi ko te nuinga o ngaa koorero kei te ahu atu ki a Taania Tapsell o Ngaati Whakaue
E rua tekau maa tahi noa iho te pakeke o Tapsell, aa i tae tuarima mai a Tapsell, ahakoa he rangatahi noa iho a Tapsell.
Ngaa Ingoa Wahi
I whakamanatia okawatia ngaa ingoa o Te Ika Aa Maaui, me Te Waipounamu hei ingoa mo ngaa motu o Aotearoa.
Naa, inaaianei naa, kua puta te koorero aa wetahi, teera pea kua tae mai te waa, kia noho te ingoa o teenei whenua hei ingoa reo rua hoki.
Ko taa wetahi e kii ana, kia noho mai ngaa ingoa o Niu Tireni me Aotearoa hei ingoa ookawa.
Heoi hei taa Keith Darroch, he paakeha, e hee ana teera whakapae, naa te mea, i toona tikanga ko Aotearoa te ingoa tuuturu mo te Ika aa Maaui anakee.
Copyright © 2013, UMA Broadcasting Ltd