Listen Now: 
October 11, 2013
Ko Te Utu Oranga Maa Ngaa Kaipaipai O Te Whare Miere
Waatea Team
Posted On October 11, 2013
Ko Te Utu Oranga Maa Ngaa Kaipaipai O Te Whare Miere
E tautoko ana te rangatira o te roopu Mana a Hone Harawira i te tono aa ngaa kaiwhakapaipai o Paaremata, kia piki ake te utu aa haora, kia pai ake ai te tuuaahua mahi hoki.
I puta te kii a Tau Henare o Naahinara, meena kaaore eenei kaimahi e pai ana ki aa raatou tuuranga mahi, tukuna ki tetahi kee atu.
Hei taa Hone Harawira, kei te tino aroha atu ia ki eera kaimahi, ko te nuinga he waahine, he maaori he iwi moutere raanei
Ka mutu hei taana anoo, me kawe ake teenei kaupapa i a Reipa me tana upoko a David Cunliffe, araa, kia piki ake te utu aa haora o eenei kaimahi ki te utu oranga
Ko Te-Ika-A-Maui Me Te Waipounamu
E rua ngaa ingoa, otira, e rua hoki ngaa reo.
Kua whakamanatia okawatia nei nga ingoa o Te Ika a Maui me Te Waipounamu hei ingoa mo te North me te South Island.
Hei taa te Minita i nga take whenua, a Maurice Williamson, e pai ana ki a ia te whakatau a Nga Pou Taunaha, ara, a te Geographic Board, kia whai mana nga ingoa Maori me nga ingoa Pakeha.
Ko Te Hononga O Te Maaori Me Nga Kaunihera-a-Rohe
E ai ki tetahi o ngai tatou e tono turanga ana i te kaunihera-a-rohe o Otautahi, e tino tika ana kia mohio nga mangai hou o te kaunihera, me pehea raa taa ratou mahi tahi ki te iwi Maori.
Hei taa Melanie Riwai Couch, he nui nga hapa o te kaunihera i roto i nga tau tata nei, a, i te whaitua e haumanu ake ana i te ru whenua, kua noho ko te iwi Maori hei pou mo nga kaupapa ahu whakamua.
Hei taana ano, hei te tau rua mano tekau ma rima tuu ai Te Matatini ki Otautahi, no reira, e tika ana kia takatuu te kaunihera mo tera
Ko Te Upoko Hou O Te Tarahiti O Port Nicholson
Kua tohua te kaitiaki Maori o mua, a Neville Baker, ki te turanga upoko o te Port Nicholson Block Settlement Trust.
Kua toa a Baker i roto i te whakataetae ki te kaitorangapu o mua, ki a Mahara Okeroa, mo taua turanga.
I a Okeroa te turanga upoko nei i tenei tau kotahi kua hipa nei, whai muri iho i te makeretanga mai o Taa Ngatata Love i raro i nga whakapae raweke putea.
Ko Toarangatira Pomare te tangata i pootihia hei upoko tuarua
Ko Ngaa Hua O Te Whakatupu Hua Ginseng
Kua too te raa mo te whakatupu paina ki runga whenua maaori, ko te Ginseng te aapoopootanga maa ngaa kaipupuri whenua maaori
Koinei te whakapono aa te tarahiti o Maraeroa C.
Kua whakamaanuhia teenei tarahiti o Te Rohe Potae i too raatou kamupene hou, araa ko Pure-Ora Moutain Ginseng.
Hei taa Glen Katu o Maraeroa C, he pai kee ake te taiao whakatupu Ginseng i Aotearoa nei ki taa ngaa whenua taketake mo te whakatupu Ginseng araa ki Haina me Korea.
Ko Te Paihanatanga O Nga Wai I Raetihi
Me whai whakaaro ki te tapu o te maunga o Ruapehu, i a tatou e whakatikatika ana i te punaha wai o Raetihi.
Kaore te wai i te rere ki taua taone i tenei wa, na te tahawahawatanga o te awa o Makotuku ki te kohinu.
Hei taa Che Wilson o Ngati Rangi, tera pea ko te manawarangi i roto i tenei kaupapa taumaha, ko te ahei ki te whakatikatika i te punaha wai o Raetihi mo ake tonu atu, i te mea, kua roa e ngoikore ana
Copyright © 2013, UMA Broadcasting Ltd
RELATED NEWS
