September 18, 2013
Te tautohe mo te ara tuuaatea
Te tautohe mo te ara tuuaatea
Kua whakakaahoretia te hiahia o nga kaitono ara tuuaatea kia whakarite i tetahi hui koohukihuki, ki te korero i te tohanga atu o tera taonga iarere.
E mea ana te Maori me waiho ki te taha tetahi porohanga o te ara tuuaatea ma te Maori e whakahaere.
Kei te kii te Taraipiunara o Waitangi taihoa ake e whakatau te take nei kia whakatewhatewha te tono me te kii tera pea ka nui te whakaaro o te Karauna ki te homai i te puutea 30 miriona taara hai tautoko i te reo me te ahurea
Maori i tenei ao haangarau, kua rahi pea tena, hai rongoaa.
He hiikoi whakahee
E hia kee te hunga poroteehi kua tuu ki te whakahee i te hui a nga kamupene hinu i Poneke.
I tenei ata i whakakaakahuria etahi penei me te kororaa te ahua ki te whakahee i nga mahi keri hinu ki te rohe moana paatata atu ki te Whanganui a Tara.
I tera tau i whakaaetia kia tuuhura te moana i te tonga o te Wairarapa, koia te puutake o te riri i tenei raa.
Te hiahia o Sealord
Kua whai hononga te kamupene hii ika o Sealord ki te whakapoapoa te tohanga hao ika a nga iwi.
Ahakoa na te Maori kotahi haawhe o Sealord, i nga tau ki muri kua huri kee nga iwi ki etahi atu kamupene ki te riihi atu i a ratou tohanga ika ki aua kamupene, ki te whakamahi ranei i nga kaipuke o taawaahi.
Hai taa Sealord mehemea ki te piri atu nga iwi ki te hootaka e kiia nei ko Ihu too mai, ka riro ma ratou me Sealord te mana whakahaere o nga mahi me nga hua ka puta.
He tukanga huakore kua whaaia.
E uru atu ana te Kaawanatanga ki nga tukanga huakore ki te whakairo i te whakaaro o te tangata, ki taa ratou e piirangi ai.
Hai taa Winston Peters koia te rautaki pena titiro ki te kaupapa mo te tohanga hii ika.
Hai taa Peters i whakatauhia tuatahitia ki nga taamure e toru hai whiwhinga ma te tangata kotahi engari,kua tere huri taa ratou ki te whitu o nga ika.
Kaati e mea ana a Peters he tohu tera horekau he tukanga tika i whaaia e te Kaawanatanga mo tera kaupapa.
He kino te tauira i whenua kee.
Horekau he painga o nga kura hourua mo te tupu o nga tamariki no nga kaainga poohara, no nga kaainga o iwi kee.
Hai taa Metiiria Tuurei rangatira takirua o nga Kaakaarik, koia te kitenga i taawaahi na reira he aha a Aotearoa e whakatuu ai era momo kura? Koni atu i tera ka whai aua kura i a ratou ake aratohu, ko wai ka aata tirotiro i a ratou me a ratou mahi?
Hai taa Tuurei ano ehara ma nga kura hourua, ka whakapai ake te tuu a nga tamariki Maori mo te taha ki te ako.
He aha te utu tika?
He mea nui ki te rangatira hou o Reipa kia whakaritea he utu oranga mo nga kaimahi o te motu.
Ko te kii taurangi a David Cuniliffe rangatira hou o Reipa, maana tera whakaaro e whakatutuki a tona waa.
Heoi ano hai taa John Minto etahi o nga kaitono mo te tuuranga hai koromatua o Taamaki, e tika ana kia whakatauhia te utu ki nga kaimahi teitei araa kia whakaata te utu puutea hai hoatutanga ki nga kaimahi paapaku.
Copyright © 2013, UMA Broadcasting Ltd