September 17, 2013
Nga kura hourua hou
E rima nga kura hourua araa charter schools ka whakatuuwheratia a tera tau.
Kei Taamaki Makaurau me te Taitokerau era kura, ko etahi he kura Maori.
Hai taa Hekia Parata Minita Maatauranga, ka whai huarahi era kura hai whakaara ake i nga mahi ako.
Hai taana ano, ka tukua he kirimana ono tau ki ia kura hourua aa ka herea ratou ki nga tikanga paakaha ma ratou e whai.
Te pai o Cuniliffe.
Ka kaha ake a David Cuniliffe rangatira hou o Reipa ki te aro ki nga kaupapa a te Maori.
Koia te matapae a Nanaia Mahuta mema paaremata o Hauraki Waikato.I tenei raa ka karangahia e Reipa te ingoa o to ratou rangatira tuarua hai taa Mahuta, e maaia ana ia ka tuu kotahi ratou ki te tautoko i a Cuniliffe.
Kaati e kore a Mahuta e rapu tuuranga teitei,ko ana tamariki me tana rohe pooti nga mea nunui ki a ia i tenei waa.
Heoi ano, ko David Parker te tangata ka tuu hai tuarua mo Cuniliffe.
He korero mo te ora o nga mea katoa.
He aha te tikanga o te kupu ora? Koia tetahi ahuatanga hai tirohanga atu ma te huinga o nga maatanga hauora i tenei wiki ki Ngaamotu.
Hai taa Kahurangi Anne Salmond, me pehea e whakatahuri nga hononga o te tangata ki te taiao kia ora ano.
Hai taana ano, he tino aawangawanga te tupuheke o te taiao whaanui ki te mate, maana tera kaupapa nui e korero aa, ka titiro ki nga korero tuku iho a nga tuupuna mo te taiao he tauira hai whai i enei raa.
He kino tonu nga tatauranga kai paipa.
Ka momi paipa te tini rawa o nga waahine Maori i te waa e hapuu ana na runga i nga taimahatanga i te kaainga, koia tetahi raruraru nui.
Hai taa Tracey Cornell kaimahi auahi kore i te Taitokerau e tohungia ana nga waahine hapuu ki tetahi ratonga aukati kai paipa, koni atu i tera ko te tautoko o te whaanau te mea tino nui.
I tenei waa 40 paiheeneti o nga waahine Maori kei te hapuu ka momi paipa.
Me pooti tatou.
Kia kaha nga whaanau Maori ki te pooti i nga pootitanga a rohe mo nga kaunihera.
Koia te kupu whakatenatena a Len Brown koromatua o Taamaki Makaurau, i runga i te mohio he iwi ngoikore tatou ki te pooti.
Hai taa Brown ano, hai te tau 2016 ka tiimata te tikanga tuku pooti ma te ipurangi ma te waea ranei a taua waa raa ka piki maarika te pooti Maori, ka huri maarika te kanohi o te toorangapuu i Aotearoa.
Copyright © 2013, UMA Broadcasting Ltd