February 22, 2023
Ka taea te whai rautaki anō mō ngā ngahere paina: Dewes
Tērā pea me kati te tope i te katoa o tētehi ngahere paina i te wā kotahi hei kaupare i te haupū o ngā poro rākau ki ngā awa.
Koia nei te kī a te upoko o te Tōpūtanga Māori o ngā Kaiwhiwhi Ngāherehere, a Te Kapunga Dewes. Hei tāna, nā te pūtea te take i pērā ai te mahi tope. Heoi ka taea te whai rautaki anō, mā te waiho o ētehi ngahere hei ārai i ngā awa, pea, mā te tīpako wāhi o te ngahere hei tope hoki pea.
Heoi, ka kī tonu a Dewes, he utu tā ēnā momo rautaki ki ngā kamupene, nō reira me wānanga te rāngai ngahere paina me te kāwanatanga hei whai anga whakamua.
“Nā te mahi o te huripari a Gabrielle i te wiki kua taha ake nei, tērā pea te catalyst hei tīmata te kōrero, hei tīmata te wānanga e pā ana ki ēnei kaupapa. Ehara tēnei kaupapa i te mea ngāwari noa, he maha rawa ngā amuamu, ngā taipitopito kōrero e pā ana ki te kaupapa nei, nā reira me wānanga tātou e pā ana ki te kaupapa nei. Tērā te tīmatanga.”