March 08, 2016
Nehu moana
E riri ana etahi o nga hapuu o te Taitokerau ki te tikanga e whakahaerehia ana e te Paakeha kia nehu tuupaapaku i te moana.
Kua hui nga roopu Maori ki te Tari Whakaruruhau Taiao inanahi ki te korero i nga whakahaere tanumanga, na te mea kaahore nga hapuu e maarama ana ki nga tikanga a te tari raa.
E noho taarewa tonu ana te kaupapa whaanui i tenei waa.
Waeroa kua hopukia
Kua hopukia he waeroa i te tauranga wakarererangi o Taamaki Makaurau e taea ai te hari i etahi maauiuitanga pera i te mate Zika.
Ka whakakaha i nga tikanga tirotiro ngangara a muri atu nei hai taa te Tari Hauora na to ratou whakautu mauritau kiihai taua waeroa i whai waahi ki tenei whenua.
Kaati kaahore nga waeroa taketake o Aotearoa e hari ana i nga mate kikino.
He moumou puutea?
Kua raukotingia te whakahoutanga 24 miriona taara o te Tari Hauora i Poneke.
Koia te whakapae a Annette King o Reipa na runga i te hiahia o te Tari ma te kaawana te nuinga o te utu e piikau.
Ko taa King me heke te Kaiwhakahaere Matua o te Tari i tana tuuranga i runga i te mohio i te tau 2012 i karangahia to ratou ahei ki te utu i te hootaka whakahou, engari i muri mai ka mea mai e kore e taea.
E mea ana a King, ko wai kei te whakakapi i nga korero tika?
Taarona he hara kino
He tino hara te taarona i te kakii o tetahi atu na reira
te Koomihana Ture e kii ana tera pea ka mauheretia te hunga taarona mo nga tau e whitu.
E mea ana te Koomihana me whakarite i te taaronatanga hai hara tauwhaaiti kaua ranei e whakapiri ai ki tetahi atu momo hara.
Atu i tera kei te kii nga kaiwhakahaere o te ture ka aroha ki nga patunga o te taarona me to ratou mataku.
Kooti whakahua reo
Kua tahuri te Tari o te Ture ki te whakaako i ana kaimahi ki te whakahua i te reo Maori.
Ka whakamahi i nga kaari whakahua me nga riipene korero hai rauemi tautoko.
Ka mutu e kii ana te heekeretari o nga Kooti a rohe a Karl Cummins ka nui to ratou whakahiihii ki te aawhina i te tupu o te reo ki roto i a ratou.
Awherika rangatahi
Kei te huna korero nga piriihimana?
Koia te paatai na te huringa o te tari raa ki te whakakaahore i te whakapae.
Na ratou i tuhi puurongo mo nga wheeako o nga rangatahi o Awherika kei Aotearoa e noho ana.
E kii ana nga piriihimana, kaahore ratou e tuukino ana i aua rangatahi o Awherika ahakoa to ratou whaaki inakuaraa ka mau pokerehuu i a ratou nga whakaaro kino mo nga rangatahi Maori.
Copyright © 2016, UMA Broadcasting Ltd: www.waateanews.com