August 02, 2017
He mihi ki Te Taura Whiri
He mihi ki Te Taura Whiri
Kua tino whanake, kua tino mahorahora Te Reo Maori i enei tau toru tekau nei. Kei te tuku mihi a Kahurangi Iritana Tawhiwhirangi ki Te Taura Whiri i te Reo Maori i whakanui nei i to ratou huritau toru tekau i te wiki nei. Hei taa Kahurangi Iritana, ahakoa te pai o nga hotaka whakarauora reo i roto i enei tau nei, ara te kura nui, te kura roa kei mua i te aroaro e tino ora rawa atu ai to tatou reo.
Tautoko a Peters i te whakatuunga o Davis
Kei te tautoko a Winston Peters i te whakatuunga o Kelvin Davis hei kaiarahi tuarua i te roopu Reipa, heoi, hei taana, ka mahue taa Reipa mahi pera i mua noa atu i tenei. Na tana whakatuunga ki te turanga kaiarahi tuarua i a Reipa, me hoki a Davis ki runga i te rarangi ingoa a te roopu. No reira, ka hoki a Davis ki te whare paaremata a muri i te kowhiringa pooti, ahakoa te aha, na te mea, kei te turanga nama rua i te rarangi ingoa. Ae ranei ka huri Te Tai Tokerau ki te pooti ki a Hone Harawira inaianei, kia tokorua nga taangata mo ratou ki te whare paaremata.
Nga pepi mate pouraka
Kua tukuna te kirimana whakahaere i te kaupapa mo nga pepi mate pouraka, ki te ratonga hauora o Hapai Te Hauora. I te roopu Whakawhetu taua kirimana i nga wa o mua. Hei taa te tahuhu rangapu o Hapai Te Hauora a Lance Norman, he take nui te matenga ohorere o a tatou pepi, a, ko te whainga kia heke te tatauranga mo te maha o nga pepi ka mate pouraka i roto i nga tau e tu mai nei
Whai hua te whaaki a Turei
Te ahua nei i whai hua taku whaaki atu i aku mahi tinihanga i te punaha penihana o tenei whenua i nga wa o mua. Koira taa te kaiarahi i Nga Kakariki, taa Metiria Turei. Hei taa nga tatauranga a Colmar Brunton, kei nga Kakariki te tekau ma wha orau o te tautoko, a, kaore ano kia pera rawa te nui o te tautoko ki nga Kakariki, mai mai mai. Hei taa Turei, te ahua nei, i puea te puaroha o te tangata i ana korero mo ona okenga i nga wa o mua.
Nga whakahee o Ngatiwai
Ahakoa te tini o nga whakahee a nga uri o Ngatiwai e pa ana ki te whakaaetanga a to Ratou Runanga kia tangohia e Alexander Abramov, tanga piriona taara nei no Ruhia, he wai i te awa o te rohe hei taauwhiuwhi maana ki runga i nga tipu me nga maara i tona whare, i te Helena Bay Resort i Whangaruru. Hei taa te toihau o te Runanga o Ngatiwai, a Haydn Edmonds, i ata korero a Abronov ki te hapu me te Runanga i mua i tana tono kia tangohia he wai. Tuia ki tena, hei taa Edmonds, ina te nui o nga mahi pai kua mahia e Abronov hei oranga mo te hapu me te hapori.
Copyright © 2017, UMA Broadcasting Ltd: www.waateanews.com