November 05, 2018
Matangurunguru a Davis ki tana hapū
Matangurunguru a Davis ki tana hapū
E matangurunguru ana te māngai torangapū mō Te Taitokerau a Kelvin Davis, kaore tōna hapū i te tautoko i te rautaki hei whakatau i te tono raupatu nui a Ngāpuhi. Hei tēnei rā mere ka rere ngā whārangi pooti ki ngā uri o Ngāpuhi, engari, kaore ngā hapū o Ngāti Hine me Ngāti Manu i te pooti, kei te aki rānei i o rātou uri kia pooti whakahē. Hei tā Davis, tekau mā tahi tau a Ngāpuhi e ngana ana ki te whakatutuki i te kaupapa, engari, kei te whakararua rātou e ētahi. Hei tā Willie Te Aho, roia mā Ngāpuhi, e ngana ana rātou ki te tāuwhi i ngā hapū ki tēnei kaupapa.
Hāngai ana te kaupapa KiwiBuild ki te hunga o waenganui
E ai ki tētahi o ngā māngai o te roopu Mana, anō nei e hāngai ana te kaupapa KiwiBuild ki te hunga ehara i te pōhara, ehara i te whai rawa, engari, kei waenganui i ērā āhuatanga. Hei tā John Minto, ko te mate o te kaupapa whare hou a Reipa ki roto o Porirua, ka mate pea ngā whānau Māori o te takiwā ki te nuku, nā te mea, ka hokona ēnei whare hou nei e te hunga whai rawa ake i a rātou, mea rawa ake, ka piki te uara o ngā whare o te takiwā, tae atu ki ngā reiti.
Mate ohorere a Tama Renata
I mate ohorere te mātanga whakatangi rakuraku rā a Tama Renata i te pō tapu. I tōna tikanga kia whakatangi tahi ia me tētahi atu tohunga rakuraku o te ao Māori, me Billy TK inapō, auare ake. I whakaurua a Renata ki te whare tapere waiata o Aoteraoa i te tau rua mano tekau mā rua i te taha i a Herbs, a, nāna te waiata taki i te kiriata Once Were Warriors i āta tito, i āta whakarite.
Ūtoka ngā tūru Māori ki te whare pāremata
Me kaha te Māori ki te pooti ki te pire e whai ana kia ūtoka ngā tūru Māori ki te whare pāremata, ki ngā kaunihera-a-rohe. Koirā te whakahau a te kaikōkiri i te pire a Rino Tirikatene māngai mō Te Tai Tonga. Hei tāna, e akiaki ana te roopu Hobson's Pledge i te marea kia pooti whakahē i te pire.
$17 miriona 600 kaiako hou
E mīharo ana tētahi o ngā māngai Māori o te rāngai mātauranga, i te rua rau, tekau mā whitu miriona tāra kua pānuitia mai e te Kāwanatanga kia tū ai te ono rau kaiako hou hei āwhina i ngā tamariki, he uaua ki a rātou te ako. Hei tā Jack Boyle, perēhitini o te Uepū Kaiako Tuatahi o te motu, kua whakarongo te Kāwanatanga ki ngā karanga a ngā kaiako kia kaha ake te tautoko i ngā tamariki ako pōturi.
Copyright © 2018, UMA Broadcasting Ltd: www.waateanews.com