December 20, 2023
Ka whakahoua te whakaaturanga Tiriti ki Te Papa
Ā tōna wā whakahou ai te whakaaturanga Tiriti o Waitangi o Te Papa Tongarewa i riwhatia e ngā kaiporotēhi i tērā wiki, heoi i mua i tēnā me wānanga te motu mēnā ka panonitia ngā kai o roto.
Koia nei te kī a ngā tumu whakarae takirua o te whare taonga, a Tākuta Arapata Hakiwai rāua ko Courtney Johnston, mō te whakamātakitaki e whakaatu piritaha ana i te Tiriti o Waitangi me tana whakapākehatanga.
Nā te rōpū Te Waka Hourua te momo reo Ingarihi i haehae, ko tā rātou kī ka whakapōhēhētia te kaimātakitaki e tika ana te whakapākehātanga o te momo reo Māori.
E ai ki a Hakiwai rāua ko Johnston, kua rongo rāua i te karere a Te Waka Hourua, ā, e tika ana ka matapakihia ngā kaupapa Tiriti. Waihoki, ahakoa kua riwha, e wātea tonu ana te whakaaturanga ki te tini me te mano hei kai mā te hinengaro.
Ka kī tonu a Hakiwai rāua ko Johnston kua kitea kētia ngā wānanga whai painga ki waenga i ngā tūwaewae e haere atu nei ki te mātakitaki ki te whakaaturanga kua haehaetia.