November 28, 2023
He patō ua, he mataku
Kua kore ngā tāngata o Te Tai Rāwhiti e rekareka ki te patō o te ua ki te tuanui o ō rātou whare – ka mataku kē rātou he waipuke anō kei te haere.
Koia nei te kī a te kaiwhakahaere ohotata o Te Kaunihera o Te Tairāwhiti, a Ben Green, whai muri i te āwhā i kōpiro ai te takiwā i ngā rā whakatā kua hori. Hei tā Green, e ngenge ana, e hēmanawa ana ngā kainoho o te rohe i ngā āwhā e karapipiti ana i Te Matau-a-Māui. Tāpiri atu ki tērā, e ohiti rawa ana ētehi tāngata, me te aha i tōmua tā rātou whakawātea whare i te wā o te pikinga awa i ngā rā whakatā.
Kotahi rau mā toru mirimita te nui o te ua i taka ki runga i a Wairoa i ngā hāora e 24 tae ana ki te ahiahi o te Rātapu. I taua rā tonu, i mate tētehi kaitaraiwa nā te tukinga o tana waka ki tētehi horo i te Ara Matua 2 e tata ana ki a Wairoa.