July 04, 2023
He whakaruruhau Māori mō ngā kaiako tamatāne
Mā te ahurea Māori e whakaruruhau ai tetahi hui mā nga kura tamatāne o te ao ka tū ki Tāmaki Makaurau i tēnei wiki.
Hei āpōpō tīmata ai te hui ā-tau o te Whakakotahitanga o ngā Kura Tamatāne ā-Ao ki Te Kura Tuarua o Ngā Taitamatāne o Ururoto, ko tāna he aro ki te tūāhua e whakaako ai ngā tamatāne, ā, e whā rā te roa.
E ai ki tā te kura kaihautu Māori, a Johnny Waititi, he wā motuhake tēnei hei whakaatu atu i te ātaahua o te ao Māori ki ngā mātanga whakaako e ono rau neke atu.
“Ahakoa ko tēnei te tū tuarua (o tēnei hui) ki konei (ki Aotearoa), ko tēnei te wā tuatahi e whakaatu ana tō tātou Māoritanga ki te ao. Ka tū he pōhiri, ka haramai ngā kaikōrero nō Te Kawerau ā-Maki me Ngāti Pāoa hei tautoko i tō tātou nei kaupapa. Ko taku tino kōrero ki te tumuaki, mēnā e hara mai ana te ao ki Aotearoa, ko te mea tuatahi ka noho mārika tēnei hui i raro i te tikanga o ō tātou tūpuna.”