June 27, 2023
Ara mai a Matariki, ara mai te taiohi
Mā te tuku a Ngāti Maniapoto i ngā mahi whakahaere i te kaupapa Matariki ki ngā rangatahi e ora ai ēnā tikanga i te āpōpō.
Koia te kōrero a tētahi o ngā kaiwhakahaere i te rau kai atua o Ngāti Maniapoto, a Isaiah Wallace, mō te tū o tō rātou kaupapa Matariki i te Paraire.
Hei tāna, ko te rau pae atua tā rātou kupu mō te hautapu, ā, kua waimārie ia i te tuku a ōna kaumatua i ngā kōrero tuku iho pēnā ki a ia, hei whakaora tonu i ngā tikanga o te iwi.
Hei tā Wallace anō, “Mōku ake, i te mea ko tēnei noa taku hautapu tuarua, nō reira te kohikohi i ētehi kōrero a ō tātou tūpuna, i ō tātou kaumātua ki tēnei tūāhuatanga o te hautapu ki a mātou o Maniapoto. Ka whakakōrerohia rā i o tātou kaumātua ko tō tātou kupu mō te hautapu, ko te rau kai atua. Nō reira, nā mātou te whiwhi i whaiwhai nei i o mātou kaumātua i a mātou te whakatutuki i tēnei kaupapa.”