June 07, 2023
Ā te Akuhata whakatau ai te rārangi pōti o Nāhinara
Ka rua tonu ngā marama kia whakatau ai te Pāti Nāhinara i tō rātou rārangi pōti. Koia te kōrero a te perehetini o te rōpū Māori o Nāhinara, a Tūwhakairiora Williams, ki tā mātou hōtaka o Manako.
Hei tā Williams, kei te tū ngā hui ā-tau o tēnā rohe o tēna rohe i tēnei wā tonu, ā, ka whakaingohia e ia takiwa ōna māngai.
I kī tonu a Williams hei te marama o Akuhata ka kohia aua ingoa katoa kia hanga ai tō rātou rārangi pōti.
Hei tā Williams, “Ko taku whakaaro, ā te marama o Akuhata, ka hui tahi ngā rōpū huri noa te motu, ki te wherawhera haere i tērā kaupapa kia mohio ai ko wai, ko wai kei runga i te rārangi pōti mō Nāhinara i te kōwhiringa pōti i tēnei tau.”
I tēnei wā, e rua ngā kaitono Māori a Nāhinara, ko Harete Hipango mō te tūru o Te Taihauāuru rāua ko Hinurewa Te Hau mō te tūru o Tāmaki Makaurau.