March 30, 2023
Ko te kaupapa ko te hauora rangatahi
Ko te hauora o te mātātahi te ngako o te wānanga motuhake a Pou Tautoko Rangatahi, i tū i Waipapa Taumata Rau i Tāmaki Makaurau i te Hātarei. He wānanga tēnei mā ngā taitamariki mai i te 13 tau te pakeke ki te 24 hei matapaki i ō rātou wawata, ō rātou āwangawanga hoki e pā ana ki te hauora rangatahi.
Nā te ratonga hauora ProCare te wānanga i whakarite, ā, e ai ki tana Kaiwhakahaere Mana Taurite Maori, ki a Mihi Blair, he hirahira ngā whakaaro i putaputa mai i ngā rangatahi, ina koa ki te waipiro, te momi rehu me ētehi atu tarukino.
I whai wāhi atu hoki te mema Pāremata a Willow-Jean Prime, ā, hei tāna, he wānanga whai take tēnei ki ana mahi hei Minita Rangatahi, hei Minita Tūhono mō te Hauora anō hoki.
“I tēnei wā, nā te mea e ono wiki noa iho ahau e mahi ana hei Minita mō ngā Rangatahi, ko taku tino hiahia kia rongo i ngā kōrero, ngā whakaaro o Ngāi Rangatahi kia kite ahau he aha ō rātou hiahia, wawata, whakaaro, me pēhea te whakauru tērā ki roto i taku mahi i roto i te Whare Pāremata i tenei wā.”