March 22, 2023
Waewae ki te $100,000
Kua eke te kaupapa kohi pūtea a Waewae te 35 ki te kotahi rau mano tāra, ā, hei tā te kaiwhakataki i te kaupapa, e noho whakahihi ana ia i te whakaaro nui a tēnā, a tēnā.
Koia te kōrero a Te Aorere Pēwhairangi, nāna te huarahi 35 i takahi atu i Tūranga ki Wharekahika, hei kohinga pūtea mā ngā taone o te takiwā i raru nui i te takahi haere a Huripari Gabrielle.
Hei tā Pewhairangi, ko te manawanui o ērā i pākinotia e te huripari tētahi o nga mea e maharanui ana i a ia.
Ka kī tonu ia, “He nui ngā aupiki me ngā auheke. Hei whakarāpopoto pea, i tāku i kite ai, i tāku i rongo ai, ko te pakari o te iwi ahakoa ngā pōkaikahatanga, ahakoa ngā taumahatanga, ko rātou tonu tērā e whakaaro ana ki ētahi atu. Ka tae au ki Mea wāhi ka kī mai rātou, āe, i pākinotia mai mātou, ēngari ko Mea mā kei te kino kē atu i a mātou. Ka tae atu ki reira, e pērā ana ā rātou kōrero mō tētahi atu moka.”