August 31, 2020
Ngā karere o te wā
Taumata 2.5 ki Tāmaki
Koinei te rā tuatahi o te hekenga o Tāmaki i te taumata tuatoru ki te taumata tuarua, engari, he rerekē te āhua o te taumata tuarua ki Tāmaki, tēnā i te taumata tuarua ki ērā atu rohe o te motu.
E rua pea ngā rerekētanga nui ki Tāmaki, arā, tuatahi, ahakoa kua heke ki te taumata tuarua ināianei, kāore e pai ana kia neke atu i te 10 tāngata ki te wāhi kotahi e hui ana.
Ko te tikanga ki te motu, kia kaua e neke atu i te 100 tāngata.
Tuarua, me mātua ū a Tāmaki ki ngā tikanga tū tiriwā.
Ko te ture hōu mō te motu whānui, kia mau kōpare te katoa, mēnā rā, kei runga i ngā waka tūmatanui, arā, te pahi, te tereina me te waka rererangi.
Mā Tūhoe anō a Tūhoe
E totara waahi rua ana Te Uru Taumatua me nga marae o Tūhoe, i runga i te whakatau a Te Uru Taumatua kia kaua ngā marae e tono i te putea a te Minita Whakawhanake Rohe, a Shane Jones hei whakapaipai i ngā marae o Tūhoe. Hei tā Te Uru Taumatua, mā Tuhoe anō a Tūhoe e tautoko i roto i tēnei kaupapa mō te whakapaipai i ngā marae, ā, ki te tono ki te Kāwanatanga, ka tahawahawa i te mana motuhake o Tūhoe.
Hei tā Hinerangi Goodman, toihau o te marae o Tātā te Hoata, kāore ia i te whakaae, ā, kei tōna marae te mana, mēnā e hiahia ana rātou ki te tono pūtea āwhina i te Kāwanatanga.
Hākinakina
I te āhua nei, kua whai whakakaaro a Kahurangi Noeline Taurua, me aha a Laura Langman, whai muri iho i tāna whakatau kia rītaia ia i te poitarawhiti, arā, me kuhu ia ki ngā tūranga whakahaere hākinakina.
14 tau i oti i a Langaman i roto i te taumata o te Poitarawhiti, 163 āna whakamātautau mā ngā Rarauhe Hiriwa.
Kei te tākaro tonu a Langman, 34 ngā tau, mā te Sunshine Coast Lightning i Ahitereiria i tēnei wā, engari, hei tā Taurua, kaiako i a Langman i te Waikato/BOP Magic, Sunshine Coast me ngā Rarauhe Hiriwa, kei a Langman te mōhiotanga, te pūkeketanga me te mana kia tū ia hei tāhūhū rangapū o tētahi rōpū hākinakina nui.
Ki te rīki, kāore e kore, kei te titiro whakamuri ētahi o ngā kapa o te waru ahurei ki te kapa Tamatoa e whakatata atu nei ki a rātou.
I haupatupatu ngā Tamatoa i ngā Newcastle Knights i ngā rangi whakatā nei, 36-6, ko te tino wikitōria o ngā Tamatoa i tēnei tau, ka mutu, kei roto ngā Knights i te waru ahurei, arā, kei te tūranga tuawhitu.
Hei tā Todd Payten, kaiako i ngā Tamatoa, kua tino kotahi ngā kaitākaro i roto i ēnei wiki nei, arā, kei te kaitahi, kai te noho tahi, kei te kōrero tahi.
Hei tāna, ko te pakanga ki a Parramatta hei ēnei rangi whakatā nei, te tākaro nui o te tau, nā te mea, kei te turanga tuatoru a Parramatta, ā, ki te toa ngā Tamatoa, ka tino tata rātou ki tētahi tūranga i te waru ahurei.
Tērā pea, i mahue i te nuinga o tātou, engari, i tū te tuatahi o ngā wero mō te hīra Ranfurly i ngā rangi whakatā nei, Waitaha te kaipupuri ki a Ōtākou ki te Raki North Otago, te kaiwero. I toa a Waitaha, 71-7.
Copyright © 2020, UMA Broadcasting Ltd: www.waateanews.com