Ngā karere o te wā

Ngā take torangapū

Hei tā Judith Collins o Nāhinara, ki te Kāwanatanga rātou, ka whakatūria e rātou he rōpū motuhake hei tiaki i ngā kūaha ki tēnei whenua, kia kore ai te hunga e kawe ana i te mate karauna e whai wāhi mai. Ko te ingoa o te rōpū nei, ko te Kōwai Whakamaru. I hua ake te kaupapa nei i te whakapae a Nāhinara, kāore a Reipa i te whakatutuki i ngā wawata o te marea kia katia ngā kūaha ki te hunga o tāwāhi e haere mai ana ki konei me te mate karauna. Hei tā Collins, me whakamātautau i ngā tāngata katoa i mua i te taenga mai ki konei. Hei tāna, e rangirua ana te haere a te Kāwanatanga i tēnei wā, koia e kii nei ia, me whakatū rōpū motuhake hei tāwharau i te hapori. Hei tā Tākuta Shane Reti o Nāhinara, ki te kore tētahi e puta i te whakamātautau i mua i te haerenga mai ki konei, e kore tērā tangata e tukua kia haere tonu mai.

Kēhi mate karauna

E rima ngā kēhi mate karauna hōu i hua ake i tō tātou whenua i te rua tekau mā whā hāora nei, ā, ko te katoa he kēhi-ā-hapori. Hei tā Tākuta Ashley Bloomfield, e hono ana ēnei take hōu katoa ki te kāhui mate karauna i tīmata mai rā i te Tonga o Tāmaki. Tokowhā o ēnei tūroro hōu, kei Tāmaki e whai hononga ana ki te kāhui, kotahi kei Tokoroa, engari, he hononga hoki tōna ki te kāhui i te tonga o Tāmaki. Hei tā Bloomfield, kei te nui ngā whakamātautau e whakahaerehia ana, ā, i tēnei wā, e tino whakapono ana, kua kupengatia e rātou ngā kēhi katoa o te wā ki te kāhui kotahi.

Te Whānau a Apanui

Haere atu, kaua e kuhu mai. Koirā te whakatau a Te Whānau-ā-Apanui i roto i tā rātou whakatū anō i ngā taupātanga ki tō rātou rohe. Hei tā tō rātou māngai a Rāwiri Waititi, he kaupapa tēnei hei tāwharau mā te iwi i ō rātou kaumātua, i ō rātou uri hoki i te hunga nō waho i te rohe.

Tāwharau i te hapori

E oreore ana te Kāwanatanga ki te whakapakari ake i ngā mahi tāwharau i te hapori i te ngau a te mate karauna. Koira tā Pēni Hēnare, minita tuarua i ngā take hauora. Hei tāna, tokomaha ake ngā hōia e tukuna ana e te Kāwanatanga ki ngā wāhi rāhui taratahi kia kaha ake ai te tiaki i tērā hunga kia mau ki te wāhi kotahi.

Koroneihana 2020

Kua whakarāpopotohia te Koroneihana i te kotahi wiki ki te kotahi rā. Mō te wā tuatahi hoki i te hītoria o te Koroneihana, ka pōwhiritia ngā iwi o te motu, mā te ipurangi anake.

Hākinakina

E tumanako ana te kaiako ngā Tactix a Marianne Delaney-Hoshek, nā te mahi pai a tōna kapa i tēnei tau, ka maranga ake nga kaiako i te kapa Rarauhe Hiriwa ki te tīpako i ētahi o rātou. Hei te rā tū ka whakaingoatia te kapa Rarauhe Hiriwa. E ono toanga karapipiti kua oti nei i ngā Tactix i ā rātou tākaro e ono kua hipa, ā, i raro kē rātou e putu ana i te wā o te rāhui

whakamohoao tuatahi, engari, kua maea ake rātou i te korokoro o te parata, ā, hei te rā tapu, ka tuki ki te Central Pulse i te whiringa toa o te ANZ Premiership, kia tutuki ai i a rātou he moemoeā i tino pōhēhē nei rātou, tino kore rawa atu nei e tutuki i a rātou, e toru marama ki muri nei. Ka hunga mātakitaki kore te whiringa toa, ā, ka tū ki whenua rangaawatea, arā, ki Waihopai. E rua rā ā muri iho, ka whakaingoatia te kapa Rarahue Hiriwa, ā, kāore e kore, ka whai wāhi a Jane Watson,Te Paea Selby-Rickit me Kimiora Poi o ngā Tactix

Hei tā te kaihautū o mua i ngā Wests Tigers a Robbie Farah, kāore e kore ka whai te whetū o te kapa Kiwis a Benji Marshall i tētahi kirimana anō mō te tau kotahi e tū mai nei, kia tākaro tonu ai ia mō tētahi tau anō, tau whakamutunga hoki. Kua whakatau tētahi o ngā hoa tata o Marshall, a Chris Lawrence, koinei tāna tau whakamutunga, ā, e tatari ana te ao rīki kia kite mēnā, ka aruaru a Marshall i ngā tapuwae o tōna hoa taumuri o ngā Tigers.15 tau a Lawrence i te NRL, 250 āna tākaro mā ngā Tigers. Hei tā Farah ki a NRL TV, ahakoa e 35 ngā tau o Marshall, ki ōna whakaaro, kei roto tonu i tōna puku te ahi e pūkauri ake ana.

E tino pakari ana te hanga o te kapa Central Pulse mō te whiringa toa o te ANZ Premiership a te rā tapu, nā reira, he kapa rerekē tēnei i te mea i hinga rā i ngā Mainland Tactix i nga wiki tata nei. Kāore te kaihautū i ngā Rarauhe Hiriwa a Ameliaranne Ekenasio rāua ko te kaitākaro pito mata nui a Maddy Gordon i tākaro ki ngā Tactix i te tuangahuru o Hereturikōkā nei, arā, i te tākaro i hinga ai rātou i ngā Tactix, 39 – 32. Ināianei, ka tūtaki anō ēnei kapa e rua i te whiringa toa. I te māuiui a Ekenasio i taua wā, ā, i te mamae te raparapa o Gordon, engari, kei roto rāua i te kapa mō te tukinga ā tēnei rā tapu

Follow us on &

Copyright © 2020, UMA Broadcasting Ltd: www.waateanews.com

RELATED NEWS

Auckland sludge to blanket Aotea hāpuku grounds Rautaki E rere tonu te puehu