Listen Now: 
Smear Your Mea
Kua whakarewahia e ngā wāhine o Te Arawa te rā-a-motu e kiia nei ko Smear Your Mea Day hei tohu i te matenga o Talei Roimata Morrison, he wahine Māori i whakatairanga i ngā whakatūpato mō te mate pukupuku ki te whare tangata. No te marama o Pipiri ka mate a Morrison i taua mate. Ko te whainga o te kaupapa Smear Your Mea, kia kaha ake nga wāhine Māori, otirā, ngā wāhine kapa haka ki te haere ki te tākuta kia tirohia ai rātou mō tēnei mate.
Hua kore te kaupapa Kainga Whenua
Hei tā tētahi o ngā kaimahi hapori o Te Tai Tokerau, kua tino mūhore, kua tino hua kore rawa atu te kaupapa Kainga Whenua, nō reira, me turaki, me whakatū kaupapa hou ki tōna tūranga. Hei tā Ricky Houghton o te roopu He Korowai Trust, kaore te kaupapa Kainga Whenua i whakatūria ai kia tū ai he whare mō ngā whānau Māori ki runga whenua Māori, i te paku whai hua, a, nā te mea, kei reira tonu ngā whakaritenga uaua mō te whai pūtea taurewa e tū ai he whare. Hei tā Houghton, kaore ngā whānau Māori e tika ana mo taua kaupapa, i whai whare, nā te kino o ngā nama e iri ana ki runga i a rātou.
Nui ngā kaupapa tuku tono ki Waikato River Authority
Hei tā te Mana o te Awa o Waikato, arā, te Waikato River Authority, kei te nui haere te whai, kei te nui haere te hao o ngā kaupapa e tuku tono ana ki a rātou kia tautokohia e rātou ki te pūtea. Whā tekau mā rima tono kua tae atu ki a rātou i tēnei rauna toha pūtea nei, neke atu i te 17 miriona taara te uara. Hei tā Bob Penter o Te Mana o te Awa o Waikato, ko te painga atu mēnā rā e kimi ana ngā kaitono i tētahi wāhanga o te pūtea e whaia ana e rātou, arā, kia haere tahi te pūtea a Te Mana o te awa o Waikato me te pūtea a ētahi atu e tutuki ai te kaupapa. Hei te whiringa-a-rangi ka mōhio ngā kaitono mēnā rā i angitū ā rātou tono.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
