January 23, 2018
Ngā roopu torangapū ki Rātana
Nga roopu torangapū ki Rātana
E rāpoi atu ana ngā roopu torangapū ki Rātana i te rā nei, koia te timatanga o te tau torangapū mō rātou. He hui mana nui te hui ki Rātana i tēnei tau, nā te mea, koia tēnei ko te kotahi rau tau i te kitenga o Tahupōtiki Wiremu Rātana i te ariā o te atua e kōrero ana ki a ia i runga i te maunga o Taranaki. Hei te tekau mā tahi karaka ka whakaeke te peremia a Jacinda Ardern ki te pā o Rātana.
Te tiaki manuhiri ki Waitangi
Me noho tonu ngā whakahaere ōkawa o Waitangi ki te papa o te Tiriti, kia tika rā anō ngā whakahaere ki runga i te marae o te Tii. Koirā te karanga a te kuia o Ngāpuhi a Titewhai Harawira. Ka tū te pōwhiri ki a Jacinda Ardern ki te whare rūnanga i tēnei tau. Hei tā Harawira, i tino ohorere ia i te āhua o te manaaki a te marae i ngā manuhiri i tēra tau, arā, kaore i manaakihia, i tūkinohia kētia, me te aha, marae takahi manuhiri, he marae puehu.
$45,000 ki Te Kawerau-ā-Maki
Kua tuohu tētahi tangata nō te Tonga o Tāmaki ki te whakapae i roto i te kooti, i mina pūtea ia kia ūkuia e ia te whakahē a tana iwi i tētahi kaupapa whakatū whare ki te tonga o Tāmaki. Ko Saul Roberts tētahi o ngā tarahiti i runga i te Mana o Te Kawerau-ā-Maki, ā, i whakaae ia ki te whā tekau mā rima mano taara kia kaua ia e kōkiri i te tāpae whakahē a te iwi e pā ana ki te kaupapa whakatū whare nei.
Copyright © 2018, UMA Broadcasting Ltd: www.waateanews.com