Listen Now: 
Ngoikore ngā rangatahi Māori ki te pooti
Neke atu i te toru tekau oorau o ngā Māori kua rēhita ki te pooti, kei raro hoki i te toru tekau mā rima ngā tau, kaore i tuku pooti. Kua puta ngā tatauranga pooti i te Komihana Pooti o te motu. Tata ki te waru tekau oorau o te marea kua rēhita ki te pooti, i tuku pooti i te kōwhiringa pooti o tēnei tau, mē te aha, kaore anō kia pēra rawa te nui, mai rā ano i te tau rua mano mā rima. Heoi, i ngoikore tonu te iwi Māori ki te pooti, arā, ko te nuinga o ngā Māori kaore i tuku pooti, he rangatahi.
Rāhui te hokotanga ki te hunga no tāwāhi
E mīharo ana te Peremia Tuarua me te Minita i ngā Take Aorere a Winston Peters, kaore te Kāwanatanga o Nahinara i āta rangahau, mena rā e tika ana kia rāhui rātou i te hokotanga o o tātou whenua me o tātou whare e te hunga no tāwāhi. E whai whakaaro ana te Kāwanatanga hou ki te whakatū i taua rāhui, ā, e whiriwhiri ana hoki rātou mena rātou ka tautoko tonu i te whakaaetanga tauhokohoko o te TPP.
Tono raupatu a Ngatiwai
E mārama ana te Poari o Ngatiwai, me panoni pea rātou i ētahi o a rātou tikanga me ētahi o o rātou āhuatanga kia tū toa ai rātou hei kaiamo i te tono raupatu ā te iwi. Kua puta te pūrongo a te Roopu Whakamana i te Tiriti e whakahau ana i te Poari kia āta mātaitia e rātou ētahi āhuatanga hou e rata ai ngā hapu o te iwi ki a rātou. Hei tā te toihau o te Poari o Ngatiwai a Haydn Edmonds, me noho tahi rātou ko ngā hapū kia kākaho kāpuia ai rātou.
Mahi rangahau a Waipareira
E ai ki te kaituhi matua i te pūrongo a Waipareira, he māmā ake te tūhura i ngā kaupapa e whai hua ana, i te tūhura i ngā kaupapa kaore e whai hua ana. I uiui ngā kairangahau o Te Whānau o Waipareira i ngā whakatipuranga e toru o te rua tekau mā ono whānau mo tēnei rangahau, ā, hei tā te kaituhi matua o Wai Research a Tanya Allport, i ētahi wā, e pōhēhē ana ngā Kāwanatanga kei te mōhio kē rātou he aha ngā kaupapa hei āwhina i ngā whānau, engari, mā te kōrero ki ngā whānau, ka taka te māramatanga, he aha o rātou tino hiahia.
Māori kore mahi
Ahakoa kua heke te tatauranga mo ngā Māori kore mahi ki raro iho i te tekau ōrau, nui tonu ake tātou e kore mahi ana, i ēra atu iwi o te motu. I roto i te tau kotahi nei, kua heke te tatauranga mo ngā Māori kore mahi, i te tekau ira kati ono ōrau ki te iwa ira kati iwa ōrau.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
