Listen Now: 
Whare pupuri taonga ki Waitangi
Ko te whakatū whare pupuri taonga ki Waitangi e hāngai ana ki te Ope Tauā Māori o te Rua Tekau mā Waru. Koira tētahi o ngā kaupapa ohorere kei roto i te whakaaetanga e tū ai he Kāwanatanga i a Reipa, Aotearoa Tuatahi me Ngā Kākāriki. He mea waitohu te whakaaetanga inanahi, ā, hei tā te peremia hou a Jacinda Ardern, ka tū tēnei Kāwanatanga hou hei Kāwanatanga whakatinana i te kupu, whakakikokiko i te kōrero. Hei tāna, kotahi piriona tāra ka whakapaua ki te whakawhanake i ngā rohe, ka whakapikihia te utu paeraro ki te rua tekau tāra i te hāora hei te tau rua mano rua tekau, ka whakatūria he kaupapa, ko Te Kotahitanga te ingoa, kia pai ake ai tā ngā Kaiako āwhina i ngā tauira Māori.
Te tūkinotanga a Fletchers
Hei te ata nei ka tae atu he pānui i te roopu SOUL ki ngā kaipupuri hea i te umanga o Fletcher Building kia mōhio ai rātou ki te tūkinotanga a Fletchers i te whenua tapu o Otuataua. Ka tae porotū atu hoki te roopu SOUL ki te hui-a-tau a Fletchers i Tāmaki Paenga Hira i te rā nei, ki te ātete atu ki te hiahia o Fletchers ki te whakatū i te whā rau, waru tekau whare ki runga i te whenua tapu o Otuataua i Ihumātao. Nō te Māori taua whenua mo te hia rau tau, engari, i raupatuhia i te wā o ngā riri whenua.
Hunga rangatahi Māori ki te ao pākihi
Katahi anō ka mutu te hōtaka a te Young Enterprise Trust i hāngai rā ki te whakahihiko i te hunga rangatahi Māori ki te ao pākihi. Hei tā te Ūpoko o te Hōtaka, a Shane Wratt, nā rātou ko Te Puni Kōkiri, ko Te Manatū Pākihi Auaha Mahi te hōtaka nei i waihanga. No ngā rā tata nei i whakahaerehia ai te hōtaka ki runga i te Pā o Waahi, ā, ko ngā tauira o Waikato i reira e akoako ana.
Kaua e pouri mo Davidson
Hei tā Marama Davidson o Ngā Kākāriki, kaua e pouri mōna i te korenga ōna i whai tūranga Minita i te Kāwanatanga, i te mea, i mōhio ia ka kore ia e whiwhi. E toru ngā tūranga Minita kua hoatu ki Ngā Kākāriki, ā, hei tā Davidson, ahakoa kei te tūranga tuarua ia i te rārangi ingoa a te Roopu, ko te hekenga o Metiria Turei te take kei taua tūranga ia, ā, nā te āhua o ngā Minitatanga i homai, i whiriwhiri ai ngā Kākāriki kō wai ka kawe i aua Minitatanga rā.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
