October 18, 2017
He Kāwanatanga hou
He Kāwanatanga hou
E ai ki te kaiārahi i te roopu Aotearoa Tuatahi a Winston Peters, hei te ahiahi nei ia ka tohu i tō tātou Kāwanatanga hou. Hei tāna, i hui te roopu inanahi, ā, kua whakaae te katoa o rātou, ko wai ngā roopu tika kia tū hei Kāwanatanga mō ngā tau e toru e tū mai nei. Hei tā Peters, kua āta whakarongo ia ki ngā kōrero katoa a Reipa me Nahinara i te wiki nei, ā, kua tae ki te wā ki te kōwhiri i tētahi o rāua.
Taupānga mō Maniapoto
Kua whakarewa taupānga te Rūnanga ō Ngāti Maniapoto e māma ake ai te tūhono mai a ngā uri e noho tawhiti ana i te wā kāinga. Hei tā te toihau o te Rūnanga a Tiwha Bell, e iwa tekau ōrau o ngā uri kei waho kē i te rohe o Maniapoto e noho ana, nō reira, mā te hāngarau e tūhono anō ai aua uri ki tō rātou tūrangawaewae. Ko E Tū Maniapoto te ingoa o te taupānga nei.
$40,000 hei whakatipu Ginseng
Kua whai tētahi o ngā Uepū Whenua Māori o te Tonga o Waikato i te whā tekau mano tāra i te Manatū Ahumahi kia hāere tonu ai āna whakamātautau whakatipu Ginseng. I tīmata te Uepū o Maraeroa C ki te whakatō Ginseng i te tau rua mano mā ono, ā, katahi anō rātou ka hauhake i ngā hua tuatahi. Ko tō rātou hiahia inaianei, kia whakawhānui ake i te māra Ginseng me te whakatū whare umanga ki te ngahere o Pureora. Hei tā Glen Katu o Maraeroa C, mā te pūtea a te Manatū Ahumahi, ka tū i a rātou he mahere pākihi e whanake ai tā rātou mahi ki āpōpō.
Copyright © 2017, UMA Broadcasting Ltd: www.waateanews.com