Mahi o te roopu Howard League Penal Reform 

Mahi o te roopu Howard League Penal Reform 

E ai ki te tahuhu rangapu o te roopu Howard League for Penal Reform, a Mike Williams, ma te whakaako i nga mauhere ki te panui me te tuhituhi ka kore pea ratou e hoki ano ki te whare herehere. Katahi ano te roopu ka whakahaere whakapotaetanga mo etahi mauhere i ako ki te panui me te tuhituhi. Hei taa Williams, ko tona whitu tekau ma rima oorau o nga mauhere kaore e mohio ana ki te panui me te tuhituhi, kaore hoki i a ratou waa ratou tohu hautuu waka, a, ko enei etahi ahuatanga e raru ano ai ratou ka puta ana ratou i te hiinaki ki te hapori.

Te Ture Whenua 

Kei te whakarite a Reipa me nga Kakariki ki te haere ki te pakanga, ko te whakahoutanga o te Te Ture Whenua Maori te take. Hei taa te mangai torangapu mo te Ikaroa Rawhiti a Meka Whaitiri no Reipa, kei te hiahia a Nahinara me te RTM kia mana nga whakahoutanga i mua i te kowhiringa pooti i tenei tau, engari, e hiahia ana a Reipa me Nga Kakariki kia ata tohea nga wahanga tekau ma ono katoa o te pire hou nei.

Te mahi o nga pirihimana

E kokiri ana a Marama Davidson o Nga Kakariki i te whakaaro kia tuu he whakatewhatewha e pa ana ki te patai nei, he aha nga pirihimana e kaha ake nei ki te tukino i nga Maori me nga uri moutere, tena, i te tukino i etahi atu iwi, i te wa o te mauheretanga. E moorihariha ana te ngakau o Davidson i te karawhiu a nga pirihimana i taa ratou kurii niho tetee ki te aruaru i tetahi kootiro uri moutere, tekau ma rua nga tau i tenei wiki. E ai ki nga tatauranga, mo ia Pakeha kotahi ka rongo i te ngau o nga kurii a nga Pirihimana, tekau ma rua nga Maori ka rongo i taua ngau.

Te Tauoma 

E ai ki te mangai take whare o Reipa, a Phil Twyford, kei te tautoko ratou i nga wawata ohanga o Ngati Paoa, engari, kaore ratou i te tautoko i te hokotanga atu o nga papa rehia o tetahi hapori ki te iwi kia tutuki ai era wawata. Ko te RTM tetahi e tino taataa ana i te whakatau a Reipa kia pooti whakahee atu ki te pire e hoko nei a Ngati Paoa i te tekau ma tahi heketea whenua i Point England i te ra whiti o Tamaki, kia tuu ai te toru rau whare ki runga.

Kei te pukuriri a Ngati Ruanui 

E pukuriri ana a Ngati Ruanui i Taranaki, kua whakaae te Ratonga Tautiaki Taiao, ara, te Environmental Protection Agency kia tuu tonu nga hui hei whiriwhiri i te tono a TransTasman Resources ki te maina onepu i te takutai o Taranaki, tae atu ki te marama o Haratua. No Ahitereiria te umanga o TransTasman Resources, a, hei taa te Tautiaki Taiao, e hiahia ana ratou ki te rongo i etahi atu taipitopito korero me etahi atu whakamarama i a TransTasman mo taa ratou tono. Hei taa te tahuhu rangapu o Te Runanga o Ngati Ruanui a Debbie Ngarewa Packer, ano nei e hiahia ana te Tautiaki Taiao kia angituu te tono.

Te Mate haa

E ai ki te roopu e kiia nei ko Respire, e ono piriona taara ia tau ka pau ki te pakanga ki te mate huango, a, ko te nuinga o te hunga e raru ana i taua mate, he Maori. Hei taa Takuta Lilly Fraser o te Ratonga Hauora o Turuki, e rite tonu ana taana kite atu i tenei mate i te tokomaha o a tatou tamariki.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

War stories sought for legal action Treaty bills a tribute to elders Taranaki health providers consolidated