Listen Now: 
Taupaanga hou ako kupu Maori
Kua whakaputaina mai e te Whare Wananga o Otakou, he taupaanga hou, kore utu hoki hei awhina i nga kaimahi hauora ki te ako i nga kupu Maori mo aa ratou mahi. Ko Aki Hauora te ingoa o te taupaanga nei, a, he takaro kei reira hei awhina i nga neehi, nga taakuta, nga aha atu, nga aha atu o te rangai hauora ki te ako i nga kupu Maori e tika ana kia mohio ratou. Hei taa Ahorangi maataamuri Suzanne Pitama, i etahi wa, ka hiahia nga turoro Maori ki te whakamahi i te reo Maori kia whai kaupapa, kia whai ahurea o ratou mohiotanga ki nga momo mate kua pa ki a ratou.
Tarahiti Whenua o Whanganui
Kua whai waa ano te roopu e amo tiitoko ana i nga kokoraho o roto i te rohe o Whanganui, kia pai ai taa ratou kohikohi i te tautako a nga uri. Hei taa Kahurangi Simon o te Tarahiti Whenua o Whanganui, hei te tekau ma ono o tenei marama, ara, hei te ra apa, ka pau te wa ki a ratou ki te kohikohi i te tautoko e pirangitia nei. Ko te ngako o enei kokoraho, ko te waenganui me te puwaha o te awa o Whanganui. E huri haere tonu ana te Tarahiti i te motu, ki te korero ki nga uri mo enei kokoraho me nga whakataunga.
Tauira e noho ana i roto i te tuakokatanga
Hei taa te purongo a Te Whare Wananga o Tamaki, kotahi o roto i te rima tauira kura tuarua e noho ana i roto i te tuakokatanga. Hei taa te mangai torangapu mo Manurewa, a Louisa Wall, e rite tonu ana tana kite atu i te tu-ahuatanga e korerohia nei i roto i tana rohe pooti.
Hemi Rolleston mo Callaghan Innovation
Kei te peto haere te wa ki a Hemi Rolleston hei tahuhu rangapu mohoa o Callaghan Innovation. I tono ia i te turanga tahuhu rangapu, engari, i riro ke i a Vic Crone, tahuhu rangapu o mua o Xero. Koia hoki tetahi o nga tumu whakahaere i a Chorus me Telecom NZ. Hei taa Rolleston, kua whakaritea he turanga hou moona ki roto o Callaghan, ara, ko te Toihau o te Ohanga Maori.
Nga tohu Uri Aotearoa o te Tau
Kua whai waahi tetahi o nga pou o te ao matauranga Maori ki nga whiringa whakamutunga mo nga tohu Uri Aotearoa o te Tau, ara, New Zealander of the Year. Kei te Whare Wananga o Waikato a Ahorangi maataamuri Mere Berryman e mahi ana, a, koia tetahi i whakatuu i te kaupapa Te Kotahitanga, he kaupapa hei awhina i nga kaiako kura tuarua ki te whakawhanaunga atu ki nga tauira Maori.
Tuhi reta te Komihana Tika Taangata
Kua tuhi reta tumatawhaanui te Komihana Tika Taangata e karanga ana kia whakahaerehia he whakatewhatewha e pa ana ki te tukino tamariki i roto i nga tari o te Kawanatanga, mai i te ngahuru tau rima tekau ki te ngahuru tau iwa tekau. Ko te nuinga o nga tamariki i raro i te maru o era tari i aua tau ra, he tamariki Maori. Neke atu i te kotahi rau mano tamariki i tangohia i o ratou whaanau i aua tau, heoi, hei taa te Minita Whakahiato Ora a Anne Tolley, e kore te Kawanatanga e whakahaere whakatewhatewha, e kore hoki e whakapaaha, ahakoa nga whakapae e rere ana mo te morikarika o nga mahi tukino tamariki i aua tau.
Karahipi Henare Te Ua
Kua whakarewahia he karahipi hou e whakamaumahara ana i a Henare Te Ua, tangata rongonui o te ao papaho, hei awhina i tetahi taiohi Maori ki te takahi i te ara ki te ao papaho. Ko Te Ua tetahi o nga pou o Te Reo Irirangi o Aotearoa i nga wa o mua. Hei taa Carol Hirschfeld o Te Reo Irirangi o Aotearoa, ma tenei karahipi, ka noho tetahi tauira Maori ki waenganui i a ratou mo te tau kotahi, ki te ako i te matauranga papaho i nga maatanga me nga tautohito.
Tohora i mate i Moohua
Neke atu i te toru rau tohora i mate i Moohua i nga rangi tata nei, a, i te po horoi nei, e rua rau ano tohora i pae ki uta. Hei taa nga mangai o Te Papa Atawhai, ko te ahua o te takoto o te papa taatahi o Moohua tetahi o nga take e rite tonu nei te paenga o te tohora ki tera takutai. I whakaterehia ano te rua rau i pae ki uta i te po horoi, a, ko te manako kia taahoe tonu ratou ki wee moana.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
