Listen Now: 
Ka whakauru te Kaunihera o Wairoa i te paatai me kore e whakatuu i tetahi tuuru Maori mo te rohe ki a ratou kowhiringa pooti i tenei tau.
Mehemea ki te whakatauhia te kaupapa, he tuatahitanga tera mo te takiwaa raa.
Kaati kei te whai enei momo korero i te kaupapa tautohenga mo nga tuuru Maori ki te Kaunihera o Ngaamotu me te whakakaahoretanga o taua whakaaro.
Rima Mano
He mahere takaoraora ki te whakatika i te korenga o nga whare, mua tata i te putanga o te tahua puutea i te raa nei.
Koia te korero mo te rima mano taara hai taapaetanga ma te kaawana ki nga whaanau kaainga kore kia huunuku atu ratou ki waho o Taamaki.
Kua whakaritea te kaupapa i te wiki nei hai whakatau i te pakarutanga o nga raruraru hoko whare, noho whare i Aotearoa.
Whakamomori
Ka nui te tini o nga rangatira iwi taketake o te ao e tae atu ki Rotorua a tera wiki ki te matapaki i te mate whakamomori.
Hai taa Michael Naera o Ngati Pikiao, kia toru raa te roa o te hui raa e kiia nei ko Tuuramarama ki te Ora a ka whai waahi nga iwi ki te korero mo nga huarahi huamata e taea ai te whai.
Whanganui
Kua taa te ihu o nga iwi o te awa o Whanganui i te tatuunga o a ratou kereeme ki te waahanga whakamutunga.
Inanahi ka pahure te paanuitanga tuatahi o te pire e kiia nei ko Te Awa Tupua aa ka whakaturehia pea a te mutunga o te tau.
Kei roto i taua whakataunga he utu 80 miriona taara hai hoatutanga ki nga iwi.
Hai taa maangai korero a Gerrard Albert, kei te uu nga iwi o Whanganui ki nga tikanga pupuri whenua e maarama ana ki a ratou.
Te Puea
E tae atu ana nga rawa tautoko ki te aawhina i te hunga kaingakore.
Koia te korero a Hurimoana Dennis tiamana o te marae o Te Puea i Taamaki Makaurau whai muri i to ratou po tuatahi e whakarite moenga ana me te tatuunga o nga whaanau e ono ki reira.
Kei te kii a Dennis, te hanga nei kei te kite i nga uauatanga mo te taha ki te korero i waenga i nga whaanau me nga tari kaawana, i etahi waa koia te raruraru nui.
Heoi ano na te makariri o te hootoke kua puta te whakatau a te marae ki te aawhina.
Copyright © 2016, UMA Broadcasting Ltd: www.waateanews.com
RELATED NEWS
