Listen Now: 
Tainui whare
Kei te whakarite hootaka a Waikato Tainui kia hoko whare nga mema o te iwi.
Ka aawhina i nga uri ma te whakaritenga o tetahi roopu kaitohutohu hai aarahi i nga kaihoko e paa ana ki nga ahuatanga whakahirahira pera i te waariu o nga whenua.
Heoi ano kai te rapu kaitohutohu a Waikato i tenei waa kia tutuki pai nga wawata pupuri whare o te iwi.
Ture whenua
Kua whakaae te Taraipiunara o Waitangi ki te whakarongo ki te tono e mautohengia ana te whakahoutanga o Te Ture Whenua Maori.
Kei te tautokohia taua mahi whakahou e te Minita Maori a Te Ururoa Flavell hai huarahi whakatupu whenua Maori.
Ko te Kaunihera Maori tetahi o nga kaitono kei te wero i te kaupapa whakahou e korerohia nei.
Ka rongohia nga korero a aua kaitono a tera marama.
Little whakapono.
Kua rite mai a Andrew Little rangatira o Reipa ki te awhi i nga whakapono toorangapuu o ona hoa toomua.
Kua werohia a Reipa kia maumahara i o ratou puutake pera i te whakapono kaioha araa socialism.
Hai taa Little kaahore taua kupu e aronuitia ana i enei raa engari ki a ia kei taua whakapono nga tauira pai araa ko te tautoko, ko te mahi tahi kia whai hua te katoa pera ano nga ahurea Maori Pasifika.
Peters he kaupapa huakore.
Kua hopukia a Aotearoa e nga taimahatanga mo nga kaupapa pana tangata a Ahitereiria no to tatou kaawanatanga te hee ko taa tatou tirohanga ngoikore ki nga kaupapa hekenga te raruraru.
Neke atu i te 200 nga Kiwi e mauheretia ana i Ahitereiria ko ratou era kei te tatari kia peia mai ki Aotearoa.
Hai taa Winston Peters o Aotearoa Tuatahi me whakarite huarahi a Aotearoa kia tuutaki i nga hiahia o te hunga ka whakahokia mai.
Paipa whakakorengia.
Me whakarite ko te marama nei o Oketopa he waa kia mutu ai te kaipaipa ma te haapori whaanui katoa e tautoko.
Hai taa Boyd Broughton o te roopu ASH e matapae ana ka kuhu atu te tini me te mano ki te tuutaki i te wero auahi kore.
Hai taa Broughton he mea nui kia tahuri te tokomaha kaahore e kai paipa ana i te akiaki i te tokoiti ka herea ki te tuupeka.
Kaare he korero.
Kaahore te Kaawanatanga i aata korero ki Te Ohu Kaimoana mo te whakaritenga
o te moutere o Rangitahua hai waahi raahui. Ahatia e kii ana a Peter Douglas toihau
o taua roopu hao ika Maori kaore ratou e riri ana engari te tumanako kia korero mai
te kaawana ki te Maori a muri atu nei mo era momo kaupapa. Hai taa Nick Smith Minita Taiao kaare he take o te korero ki te Maori i te mea kaahore tatou e hii ika ana ki tera rohe moana.
Copyright © 2015, UMA Broadcasting Ltd: www.waateanews.com
RELATED NEWS
