Listen Now: 
Maakete wera.
Na te wera o te maakete hoko whare i Taamaki Makaurau e hia kee taangata kua peia ki waahi kee rapu whare ai.
Ko Tauranga ko Kirikiriroa ko Whangarei kei te tirohia no konaa kua piki hoki te waariu o nga whare ki era taone.
Kaati ki etahi korero ko te utu o nga whare i Akarana kei te rere ake ki te rangi me te whakapae ka piki haere te rerenga taangata ki rohe kee.
Huarere kino
He hukapapa ki te tonga, he whatitiri ki te raki.
Kei te ahu whakateraki he paaraamaatao mai Murihiku ki te Matau a Maaui.
Ka tau te hukarere ki te tonga o te Waipounamu, ki te puku o te Ika a Maaui whakawhiti atu ki te Matau a Maaui.
Ka mutu he ua taataa te korero mo te rohe whaanui o te Kaipara.
E mea ana te tari piriihimana kia tuupato ki nga paanga o te huka pango i nga huarahi o Murihiku me te hukarere maaniania
Nethui.
Hai apopo ka tuu tetahi hui i Taamaki Makaurau hai matapaki i nga kaupapa haangarau, ko Net Hui te iingoa.
Ka tuuhura i nga take mo te ipurangi me te ao matihiko kia tuu pakari tonu te Maori i tenei waa e tupu ake ai nga haangarau o te ao hurihuri nei.
Kaati ka korero etahi o nga maatanga haangarau ki te hui aa ko te ara tuuaatea me ona ahuatanga ka korerotia ae atu ki te whakaratonga o te taura here rorohiko e kiia nei ko broadband.
Taranaki haina whakataunga.
Kua haina a Taranaki tuuturu i te whakataunga o taa ratou tono raupatu Tiriti o Waitangi i tenei ata.
Hai taa Tokatuumoana Walden tiamana o te iwi e pai ana ratou ki te whakaaetanga 70 miriona taara te waariu.
Kei raro i te whakataunga nei ka whakahoki i nga waahi tapu me etahi atu whenua.
Waihoki, kua whakaritea he roopu ma ratou e tohutohu me pehea e whakatau i te tono e paa ana ki a Parihaka.
E heke ana te oohanga.
Kua hopukia te kaawanatanga e nga taimahatanga oohanga o te waa.
Koia te korero na runga i te hekenga o nga utu taputapu miraka otiraa te hekenga tuatoru no te marama o Maehe.
No konaa kua ngahoro nga tuumanakotanga whai mahi me te utu puutea ki nga kaimahi.
E mea ana te roopu Reipa kua peka te whakaaro o te kaawana ki kaupapa kee pera i te korero mo tetahi haki hou engari kua mahue nga take oohanga.
Copyright © 2015, UMA Broadcasting Ltd: www.waateanews.com
RELATED NEWS
