Listen Now: 
Whanganui puu 'h'?
A te Paraire e tu mai nei ka matapaki ano i te hiahia ki te whakauru i te puu 'h' ki te iingoa o Whanganui.
I whakakaahoretia taua hiahia e te kaunihera i reira inaianei e mea ana etahi kaikaunihera e tika ana me korero ano i taua kaupapa.
Hai taa ratou me aata whakaaro ano ratou i te kaupapa me nga momo paanga mehemea ka whakahee tonu ratou i te iinoi a te iwi kaainga me Nga Pou Taunaha o Aotearoa.
kia Whanganui te tuhinga o to ratou iingoa.
Te ohanga kei te oke.
Te hanga nei he ngoikore ake te ahua a oohanga o Aotearoa ki taa te kaawangatanga i kii taurangi ai.
Hai taa te tari tirotiro take puutea o Treasury tata ki te kotahi piriona taara kua uukuitia mai te tahua puutea o Haratua i tenei tau.
E mea ana te roopu Reipa me whakapaaha te Piriimia a John Key ki a tatou katoa ko wai ka mohio ki te tika, ki te pono o ana matapae oohanga, a muri atu nei.
He akoranga hou.
Ka whakarewa te kura waananga o NorthTec i tetahi akoranga paetahi hou mo nga toi Maori.
Ka whakaako te hootaka nei ko Maunga Kura Toi te iingoa i nga kaupapa pera i te whakairo, i te rarangi, i te raurangi hoki.
Hai taa kaiako Kura Te Waru Rewiri ka whakaata taua akoranga i te ahua o nga iwi me nga hapuu o te Taitokerau.
Hai taana ano ka whakahaere i te hootaka nei me te tautoko o etahi tino kaiako o Ngapuhi mo nga kaupapa toi Maori.
Poihaakena hanga pouri.
E rongo ana i te hanga pouri o te tangata i Poihaakena whai muri te mahi herehere taangata i reira ki etahi he mahi whakatumatuma.
E kii ana te korero ko nga patunga he harakore te katoa ko te tangata hara a Man Haron Monis i mohiotia keetia e nga piriihimana.
Ahatia ko te mahi i tenei waa atu i te wetewete mutunga kore te tuuahua nei he maumahara i te tokorua o nga patunga kua mate.
Nga Turanga Mahi.
Ko Taamaki Makaurau ko Murihiku ko te Waiariki nga rohe e meingatia ana he pai te korero mo te tupu pakihi, mo te whai mahi.
Kua heke te maha o te hunga koremahi ki te rima ira whaa paiheeneti i Aotearoa whaanui heoi ano kei te rongo aua takiwaa e toru i nga painga o te piki whakarunga o te taiao oohanga.
Nga mihi mo te tangata toorangapuu.
He tangata piripono ki te tangata me o ratou hiahia ahakoa ko wai.
Koia te korero a Taa Wira Gardiner te kaituhi o te pukapuka mo Parekura Horomia kaitoorangapuu o mua ko Kia Ora Chief te iingoa.
E mea ana a Taa Wira he tino kaiaawhina a Horomia i ona raa aa he pai aana mahi ki te piikau i nga take Maori.
Heoi ano kua pau katoa nga pukapuka otiraa ko te taanga tuatahi, ka tatuu te taanga tuarua o Kia Ora Chief ki nga toa hokohoko akuanei.
Copyright © 2014, UMA Broadcasting Ltd: www.waateanews.com
RELATED NEWS
